एजेन्सी – करिम बेन्जेमा खेल जीवनकै उच्च लयमा रहेको विश्वास गरिन्छ । रियल म्याड्रिडमा उनी पछिल्लो समय सबैभन्दा प्रभावशाली खेलाडीका रुपमा स्थापित भएका छन् । त्यहि लगातारको उच्च प्रदर्शन पछि उनी झण्डै ६ वर्षपछि फ्रान्सेली राष्ट्रिय टोलीमा पनि समेटिएका छन् ।

फ्रान्सेली फरवार्डले बालोन डी ओर तथा पेरिस सेन्ट जर्मेन (पिएसजी) सँग केहि समयमा हुने च्याम्पियन्स लिगको नकआउट र टोलीका दुई सुपर स्टार लियोनल मेस्सी र केलियन एमबाप्पेका विषयमा बोलेका छन् ।

बार्सिलोना छाडेर सिजनको सुरुवातमा मेस्सी पिएसजी पुगेपछि कतिपयले त्यो सरुवाको ओलोचना गरेका छन् । तर बेन्जेमा भने मेस्सी पिएसजीमा सफल हुनेमा आफूमा कुनै दुविधा नरहेको बताउँछन् ।

‘मेस्सीले राम्रो गर्न सक्दैनन् भन्नेमा मलाई विश्वास छैन । त्यहाँको माहोलमा भिज्न केहि समय लाग्छ नै । उनले अहिले धेरै गोल गर्न सकेका छैनन्’, बेन्जेमाले भने, ‘तर पनि मैदानमा उनले सक्दो गरिरहेका छन् । जे होस यसै कुनै खेलाडीलाई ओलोचना गर्न ठिक हुन्न । जसले मेस्सीको आलोचना गर्छन् उनीहरुले फुटबल बुझेकै छैनन् ।’

च्याम्पियन्स लिगमा उनले फ्रान्सेली टोलीका युवा स्टार एमबाप्पेको सामना गर्नुपर्नेछ । एमबाप्पेकोविरुद्धमा खेल्नु विशेष हुने बेन्जेमाले बताएका छन् । ‘हामी राम्रो साथी हौं । हेरौं खेल के हुन्छ’, उनले भने, ‘उनी जित्न चाहान्छन् र हामी पनि ।’

च्याम्पियन्स लिगको नकआउट चरणमा रियल र पिएसजीलाई सर्वाधिक महत्वका साथ हेरिएको छ । पिएसजीविरुद्धको खेलका लागि आफूहरु तयार रहेको बेन्जेमाले बताएका छन् । ‘हामी अरु टोलीसँग खेल परोस् भन्ने चाहन्थ्यौं । तर पनि हामी तयार छौं’, उनले समर्थकलाई आश्वास्त पार्ने प्रयास गर्दै भने।

बोलोन डी ओरमा बेन्जेमा चौथो स्थानमा रहेका थिए । उनले आफूले चाहेजस्तो हुन नसकेको बताएका छन् । ‘मैले सानै उमेरदेखि भन्दै आएको थिएँ । चौथो , तेस्रो , दोस्रो वा ३० औं हुनु भनेको एउटै हो’, उनले भने, ‘जित्दा मात्र त्यसको अर्थ रहन्छ । पछि कतिले मलाई धेरै उपाधि जित्न नसकेको पनि भने । तर मैले त्यो भन्दा बढी गर्न सकिन । मेरो लागि बालोन डी ओ भनेको गोल गर्नु, एसिस्ट गर्नु हो ।’