एजेन्सी – गत सिजनको उपाविजेता सेनेगल अफ्रिका कप अफ नेसन्सको सेमिफाइनलमा प्रवेश गरेको छ । इक्वेटोरियल गिनियामाथि ३–१ को सहज जित निकाल्दै सेनेगलले अन्तिम चारमा स्थान सुरक्षित गरेको हो ।

क्यामरुनमा आइतबार राति भएको खेलमा सेनेगलको जितमा फामरा दिधिओउ, चेइखोउ कोउयाटे र इस्माइला सारले गोल गरे । इक्वेटोरियल गिनियाका जान्निक बुयाला सामले एक गोल फर्काए ।

खेलको २८औं मिनेटमा फामरा दिधिओउको गोलबाट सेनेगलले पहिलो हाफमा १–० को अग्रता लिएको थियो । उनले साडियो मानेको चलाखीपुर्ण पासमा पहिलो बार च्याप्दै सहज गोल गरेका थिए । ५१औं मिनेटमा इक्वेटोरियल गिनियाले पेनाल्टीको अपिल गरेपनि भिएआरबाट मान्यता पाएन । इवान साल्भाडोरको क्रसमा कोउलीबेलीले पेनाल्टी बक्समा हातले बल छोएको देखिएको थियो ।

५६औं मिनेटमा जान्निक बुयाला सामले गोल गर्दै खेललाई १–१ गोलको बराबरीमा ल्याए । उनले पाब्लो गानेटको पासमा गरेको प्रहारले जाली चुमेको थियो ।६८औं मिनेटमा चेइखोउ कोउयाटेले गोल गर्दै सेनेगललाई खेलमा २–१ ले अघि बढाए । उनले गिनियाका दुई डिफेन्डरबीच तालमेल नमिलेको अवस्थामा अघि बढ्दै गोलरक्षक छेवैवाट जम्प गर्दै गोल गर्न सफल भएका थिए ।

७९औं मिनेटमा इस्माइला सारले गोल गर्दै सेनेगलको सहज जित पक्का गरे । उनले सालिओउ सिसको पासमा खाली पोस्टमा गोल गरेका थिए । अब सेनेगलले सेमिफाइनलमा ३ फेब्रुअरीमा बुर्किना फासोसँग खेल्नेछ ।

अर्काे क्वाटरफाइनलमा इजिप्टले मोरोक्कोमाथि २–१ को पूनरागमन जित निकाल्दै सेमिफाइनलमा क्यामरुनसँगको भेट पक्का गरेको छ । इजिप्टको जितमा मोहम्मद सलाह र ट्राजीग्वेटले गोल गरे । मोरोक्कोका सोफिएन बोउफलले एक गोल फर्काए ।