काठमाडौं (हाम्रो खेलकुद)– मछिन्द्रका फरवार्ड मनिष डाँगी ब्लू क्रस अस्पतालबाट डिस्चार्ज भएकै दिन मंगलबार उनको रेस्क्यूमा व्यवस्थापनमा कुनै कमी नभएको अखिल नेपाल फुटबल संघ (एन्फा) ले जनाएको छ ।

सहिद स्मारक ए डिभिजन लिगमा शनिबार च्यासल युथ क्लबविरुद्धको खेलको ६६ औं मिनेटमा टाउकोमा चोट लागेर घाइते भएका मनिषको रेस्क्यूमा गरिएका सबै प्रक्रियालाई एन्फाले पत्रकार सम्मेलनमार्फत सार्वजनिक गरेको हो । घटनाकै समयमा डाक्टर नभएपनि एन्फाको मेडिकल टोली, मछिन्द्रका फिजियो र खेलाडीहरुका कारण मनिषलाई होसमा ल्याएर अस्पताल पुर्याएको एन्फाकी फिजियोथेरापिष्ट नविना वैद्य श्रेष्ठले पत्रकार सम्मेलनमा जानकारी दिइन् ।

जसरी सञ्चारमाध्यममा समाचारहरु आए । त्यसले केहि दुःख पनि लागेको छ । मनिष मैदानमा ढलेको २१ सेकेण्डमा मेडिकल टोली मैदानमा पुगिसकेको थियो । दुई अवस्था टाउकोको चोट र ह्दयघात भएको अवस्थामा रेफ्रीको अनुमति नलिइ पनि मैदान छिर्न मिल्छ । हामीले त्यहि गर्यौं, उनले भनिन् । उनले चोट लागेको अवस्थादेखि मनिषलाई होसमा आएर अस्पताल पठाउँदा सम्मका सबै विषयमा वृस्तित जानकारी दिइएकी थिइन् । खेलको ६६ औं मिनेटमा च्यासलका खेलाडीसँग ठोक्किदा टाउँकोमा चोट लागेर मनिष मैदान ढलेका थिए । उनको चोटको अवस्थाको गम्भिरतालाई हेरेर रेस्क्यूको काम श्रेष्ठले बताइन् ।

‘उनी घाइते भएर ढल्दा मैदानमा फेरि टाउको ठोकिएको थियो । मैदान पुग्दा उनी अचेत अवस्थामा थिए । हातखुट्टा तनक्क पारेका थिए । दाँत किटेका थिए । होस थिएन । च्यासलका खेलाडी यानिक केचोले उनलाई मुखबाट सास फेर्न मिलोस् भनेर दाँत फटाउन सहयोग गरे, श्रेष्ठले भनिन्, ‘सुरज जीले छाती थिच्दै सिपिआर दिन थाल्नु भयो । श्वासप्रश्वास सहज बनाउन मैले मनिषको टाँउको उठाए । त्यो अवस्थामा जे जे गर्नुपर्ने थियो हामीले त्यहि अनुसार काम गरेका छौं। होस आएपछि सावधानीपूर्वक स्ट्रेचरमा पठाएका थियौं । मैले पछि भिडियो भुटेज हेर्दा ३ मिनेट उनी अचेत भएका थिए ।’

रेस्क्यूका लागि भने आफूहरुले कुनै कसर बाँकी नराखेको बताइकी श्रेष्ठले ड्यूटीमा रहेका डाक्टरले आफूलाई तपाई यहाँ सम्हाल्दै गर्नुस् भन्दै वासरुम गएको बताइन् । डाक्टर भइदिएको भए अझै राम्रो हुने थियो, उनले भनिन् । घटनाको समयमा डाक्टर घटनास्थलमा नभएकोमा एन्फाको चर्को आलोचना भएको थियो । लिगमा खटिएका डाक्टर एन्फा मातहत नभई इशारा मार्फत भएकोले संस्थागत रुपमा घटनाका विषयमा बुझ्न पत्राचार गरिएको एन्फा महासचिव इन्द्रमान तुलाधरले जानकारी दिए ।

एन्फाका महासचिव इन्द्रमान तुलाधरले फिफा र एएफसीको गाइडलाइन अनुसारको संघले मेडिकल टिम राखिएको बताए । उनले मैदानमा ४ मेडिकल सम्बन्धित व्यक्ति सधै रहने गरेको बताए । ’हामीले खेलाडीको सेफ्टीमा महत्व दिएका छौँ । लिग अघि सबैको मेडिकल गराएका थियौं। बीमा गरेका छौं । लिगमा सुविधासम्पन्न २ एम्बुलेन्स राखेका छौँ,’ महासचिव तुलाधरले भने, ’खेलाडीको स्वास्थ्यको विषय अपनाउनु पर्ने काममा एन्फा चुकेको छैन । फिफाबाट समेत पारदर्शिताको लागि जानकारी हुने गरि आउनु पर्यो भनेर हामीले टेन्डर निकाल्यौं । जस अन्तर्गत इशाराले डाक्टर उपलब्ध गराएको छ । मैदानमा ४ जनाको मेडिकल टोली सधै मैदानमा छन् । एन्फा चुकेको छैन, कतै कमजोरी भयो की भनेर इशारासँग रिपोर्ट मागेका छौँ । यति हुँदा हुँदै पनि हाम्रोतर्फबाट केहि कमजोरी भएमा भविष्यमा सुधार गर्नेछौं।’

तुलाधरले एन्फा खेलाडीको स्वास्थ्यका विषयमा संवेदनशिल रहेको र त्यहि अनुरुपको व्यवस्थापन गरिएको बताए । ‘म लामो समयदेखि एन्फामा आबद्ध छु । कुनै बेला एउटा एम्बुलेसन र विना सामान हुन्थ्यो,’ उनले भने, ‘अहिले दुईवटा एम्बुलेसन फुल इक्विप्ट् छन् । हामी खेलाडीको स्वास्थ्यका विषयमा संवेधनशिल छौं । म आफैले सुरुदेखि नै यसमा चनाखो रहन भन्दै आएको छु ।’ उनले एन्फाको मेडिकल टिमका सबैले फिफा र एएफसीको कोर्ष गरिसकेको बताए ।

डाक्टर राजु डंगोलले डिस्चार्ज भएका मनिषको अवस्था सामान्य रहेको र अर्को साता उनको एउटा परिक्षणपछि कहिलेबाट मैदान फर्कन्छन् भन्ने थाहा हुने बताए । लिग समितिका संयोजक विज्ञानराज शर्माले खेलाडीको स्वास्थ्य र उपचारमा आफूहरु सधै सजग रहेको उल्लेख गर्दै कमजोरी देखिएको ठाँउमा सुधारका लागि तत्पर रहेको बताए ।