काठमाडौं (हाम्रो खेलकुद) – आशिष चापागाईको दुई गोल मद्दतमा चर्च ब्वाइज युनाइटेडले सहिद स्मारक ‘बी’ डिभिजन लिगमा लगातार दोस्रो जित दर्ता गरेको छ । चर्च ब्वाइजले खुमलटार युथ क्लबलाई २–० ले पराजित गर्दै लिगमा लगातार दोस्रो जित निकालेको हो ।

सातदोबाटोस्थित एन्फा कम्प्लेक्सको मैदानमा आइतबार भएको खेलमा आशिषले दुवै गोल दोस्रो हाफमा गरेका थिए । ५४औं मिनेटमा आशिषले गोल गर्दै चर्च ब्वाइजलाई १–० को अग्रता दिलाए । उनले आशिष चौधरीको पासमा गोल गर्न सफल भएका थिए ।

७१औं मिनेटमा आशिषले व्यक्तिगत र टोलीका लागि दोस्रो गोल गर्दै चर्च ब्वाइजलाई सहज जित दिलाए । साइनम लिम्बुको फ्रिकिकमा उनले हेडरमार्फत सुन्दर फिनिस गरेका थिए । योसँगै लिगमा उनले दुई खेलबाट ५ गोल पु¥याएका छन् ।

यसअघि चर्च ब्वाइजले टुसाल युथ क्लबमाथि ५–२ को जित दर्ता गर्दा आशिषले ह्याट्रिक पूरा गरेका थिए । खुमलटारले पहिलो हार बेहोरेको हो । यसअघि खुमलटारले पहिलो खेलमा रानी पोखरी कर्नर टिम (आरसिटी) लाई ३–१ ले पराजित गरेको थियो ।

जितसँगै चर्च ब्वाइजको २ खेलबाट ६ अंक पुगेको छ । समान ६ अंक नै रहेपनि टोखा श्री भगवती गोलअन्तरमा दोस्रो स्थानमा रहेको छ । खुमलटारको दुई खेलबाट ३ अंक छ । लिगमा १४ क्लबको सहभागिता रहेको छ । शीर्ष दुई टोली शीर्ष डिभिजनमा बढुवा हुनेछ । पुछारको दुई टोली रेलिगेसनमा पर्नेछ ।