एजेन्सी – फिफा विश्वकप २०२२ अन्तर्गत युरोपेली छनोटको प्लेअफ फाइनलमा पोर्चुगलले नर्थ म्यासेडोनियाको सामना गर्दैछ । खेल नेपाली समयअनुसार मध्यरात १२:४५ बजे सुरु हुनेछ ।

पोर्चुगलका कप्तान क्रिस्टियानो रोनाल्डोले खेलको पुर्वसन्ध्यामा बोल्दै आजको खेल जीवनको सबैभन्दा महत्त्वपूर्ण खेल रहेको बताएका छन् । ६७ औं वरीयतामा रहेको नर्थ म्यासेडोनियाले युरोपेली च्याम्पियन इटालीलाई हराउँदै फाइनलमा स्थान बनाएको थियो । खेलको अन्तिम समयमा गोल हुँदा इटाली १-० ले स्तब्ध बनेको थियो । यता पोर्चुगलले भने टर्कीलाई ३-१ ले हराएको थियो ।

रोनाल्डोका लागि सम्भवत यो अन्तिम विश्वकप हुन सक्छ । अर्को विश्वकप आउँदा उनी ४१ वर्ष पुग्ने भएकाले पनि उनी यो अवसर गुमाउनेबारे सोच्न चाहदैनन् । रोनाल्डोले आफ्नो करियाभर लगातार विश्वकप खेलेका छन् । यसपटक छनोट भए उनले पाँचौ विश्वकप खेल्नेछन् । हालसम्म उनले विश्वकपमा ७ गोल गरेका छन् ।

रोनाल्डोले घरेलु मैदानमा उपस्थित समर्थकलाई टोलीको पछि लाग्न आग्रह गरेका छन् । ‘मैले हिजो राती सुत्नुअघि हाम्रो राष्ट्रिय गान स्पिकरमा होइन, मैदानमा उपस्थित समर्थकले एकसाथ गएको सोचें । यसले हाम्रो लगाव, शक्ति र एकता प्रस्तुत गर्छ । हाम्रो विश्वकप पुग्ने लक्ष्य प्रष्ट पार्छ,’ उनले भने ।

‘हाम्रो लागि यो खेल जीवन र मरणजस्तो हो । यो खेल जित्न ठूलो जिम्मेवारी छ । यो हाम्रो लागि जीवनको सबैभन्दा महत्त्वपूर्ण खेल हो । हाम्रो विपक्षीले अन्य थुप्रै टोलीलाई अचम्मित पारेको छ, तर मलाई विश्वास छ हामीलाई त्यस्तो गर्नेछैनन्,’ रोनाल्डोले थपे ।

रोनाल्डोले सन् २०१६ मा टोलीलाई युरो २०१६ को उपाधिसम्म डोर्याएका थिए । अन्तर्राष्ट्रिय फुटबलका सर्वाधिक गोलकर्ता रोनाल्डो अहिले नै भविष्यबारे सोच्न चाहदैनन् । ‘मेरो भविष्यबारे निर्णय लिने म मात्र हुँ,’ उनले भने, ‘मलाई खेल्न मन लाग्छ भने म खेल्छु । मन लागेन भने खेल्दिन ।’