एजेन्सी – इंग्लिस प्रिमियर लिग अंन्तरगत आज (मंगलबार) राति महत्वपूर्ण खेलमा मर्सिसाइड क्लब लिभरपुलले घरेलु मैदानमा म्यानचेस्टर युनाइटेडको आतिथ्यता गर्दैछ ।

निकै नै महत्वपूर्ण मानिएको खेलमा एनफिल्डमा नेपाली समयअनुसार राति १२ः४५ बजे सुरु हुनेछ । शीर्षस्थानमा रहेको म्यानचेस्टर सिटीसँग १ अंकले मात्रै पछि रहेको लिभरपुल युनाइटेडलाई हराउँदै शीर्षस्थानमा उक्लने दाउँमा हुनेछ ।

प्रिमियर लिगमा गत डिसेम्बरमा लेस्टर सिटीसँग घरेलु मैदानमा १–० ले पराजित भएयता लिभरपुलले पराजय बेहोरेको छैन । च्याम्पियन्स लिगमा भने इन्टर मिलानसँग हार बेहोरेको थियो । युनाइटेडमाथि गत अक्टोवरमा ५–० को फराकिलो जित निकालेको लिभरपुल सोही जितको लयलाई कायम राख्दै लगातार जित निकाल्ने लक्ष्यमा हुनेछ ।

युनाइटेडलाई आउँदो सिजन च्याम्पियन्स लिगमा छनोट हुने सम्भावनालाई जिवितै राख्न लिभरपुलविरुद्ध अंक जोड्न आवश्यक छ । यो सिजन कमजोर लयमा रहेको युनाइटेडलाई लिभरपुलविरुद्ध जित निकाल्न कठिन हुनेछ ।

यसअघि क्रिस्टियानो रोनाल्डोको ह्याट्रिकमा नर्विच सिटीलाई ३–२ ले पराजित गरेको युनाइटेडका लागि रोनाल्डो नै हतियार बन्ने सम्भावना छ । तर, जुम्ल्याहा सन्तानमध्ये एक सन्तान गुमाएका रोनाल्डोले खेल्ने नखेल्नेमा दुविधा रहेको छ ।

चौथो स्थानमा रहेको टोटेनहमसँग ३ अंकले पछि रहेको म्यानचेस्टर युनाईटेडले आउदो सिजन च्याम्पियन्स लिगमा सहभागिता जनाउनका लागि हरेक खेल जित्नु पर्ने दबाब रहेको छ ।

युनाईटेडविरुद्ध पछिल्ला ५ प्रिमियर लिगका खेलमा ४ मा जित र एकमा बराबरी गरेको लिभरपुल आज पनि सोही लक्ष्यलाई निरन्तरता दिने प्रयासमा रहेको छ । प्रिमियर लिगमा लिभरपुलविरुद्ध लगातार सात खेलमा जितविहीन रहेको युनाईटेडले पछिल्लोपटक २०१८ मा २–१ ले खेल आफ्नो पक्षमा पारेको थियो ।