काठमाडौं (हाम्रो खेलकुद)– लिग संयोजकबाट विज्ञानराज शर्माले दिएको राजीनामालाई अखिल नेपाल फुटबल संघ (एन्फा) ले अस्वीकृत गरेको छ ।

‘एन्फाको निर्वाचन घोषणा भइसकेका र ए,बी, सी मध्ये सी डिभिजन प्रतियोगिता गर्न बाँकी रहेकोले तपाईहरुको राजीनामा अस्वीकृति गरिएको जानकारी गराइन्छ,’ शर्माले दिएको राजीनामा पत्रमा अध्यक्ष कर्मा छिरिङ शेर्पाले महासचिवलाई सम्बोधन गर्दै लेखेका छन् ।

‘ए र बी डिभिजन मेरो नै संयोजकत्वमा भयो । सी डिभिजन गर्न बाँकी छ त्यसमा एन्फाले सञ्चालनका लागि आग्रह गर्दै राजीनामा अस्वीकृत गरेको छ, शर्माले भने,‘ सी डिभिजन लिग सञ्चालनका लागि म तयार भएको हु । फुटबल गतिविधि नरोकियोस् भन्ने उद्देश्यका साथ जिम्मेवारीमा फर्कन तयार भएको हुँ ।’

नैतिकता र दोहोरो जिम्मेवारीका कारण पदमा बस्न उपयुक्त नभइरहेको भन्दै शर्माले फागुन २० गते पदबाट राजीनामा दिएका थिए । नेपाल सुपर लिग (एनएसएल) टोली काठमाडौं रेजर्सको निर्देशक समेत रहेका शर्माले एनएसएलको दोस्रो संस्करणका लागि अक्सन भएकै दिन राजीनमा गरेका थिए ।

अहिले तत्काल एनएसएल पनि नरहेको र फुटबल गतिविधि पनि जारी रहोस् भन्ने उद्देश्यले पुरानो जिम्मेवारीलाई निरन्तरता दिन तयार भएको उल्लेख गर्दै शर्माले थपे,‘ कामका दौरान कुनै कन्फ्लिक अफ इन्ट्रेस्ट देखिने अवस्था आयो भने म रहन्न । हिजो एन्फा पदाधिकारीसँग बैठक पनि थियो । मैले आफ्नो कुरा उहाँहरुलाई प्रष्ट राखेको छु ।’

एन्फाले सी डिभिजन लिग वैशाख ९ गते देखि सञ्चालन गर्दैछ । चैत २९ गतेबाटै सी डिभिजन सुरु हुनुपर्ने भएपनि तयारी खर्च उपलब्ध नभएसम्म क्लबहरुले लिग नखेल्ने भनेपछि एन्फाले वैशाख ९ गतेका लागि लिग सारेको थियो । एन्फा निर्वाचन भने असार ६ गतेका लागि तय भएको छ ।

२०७५ वैशाखमा एन्फाको पछिल्लो निर्वाचित कार्यसमितिले शर्मालाई लिग संयोजकको जिम्मेवारी दिएको थियो । ‘लिग प्रतियोगिता जस्तो महत्वपूर्ण कमिटीमा रहि स्वच्छिक रुपले विगत केहि वर्ष देखि कार्य गर्दै आएको कुरा सर्वविदितै छ ,’ शर्माले एन्फा अध्यक्षलाई दिएको राजीनामा पत्रमा भनेका थिए, ‘यसका साथ साथै विगतका वर्षको पहिलो र निकट भविष्यमा हुने गइरहेको दोस्रो संस्करणमा पनि काठमाडौं रेजर्स फुटबल क्लबमा आबद्ध भइ नेपाली फुटबललाई अझ वढि व्यवासायिक बनाउँदै एउटा उद्योगको रुपमा स्पापित गर्न क्रियाशिल पनि छु ।’