एजेन्सी – इंग्लिस क्लब लिभरपुलका फरवार्ड साडियो माने सेनेगलको सर्वाधिक गोलकर्ता बनेका छन् । अफ्रिका कप अफ नेसन्सको छनोट चरणमा बेनिनमाथि ह्याट्रिक पुरा गरेसँगै माने सेनेगलको सर्वाधिक गोलकर्ता बनेका हुन् ।

सर्वाधिक गोलकर्ता बन्ने क्रममा ३० वर्षीय मानेले हेनरी कामराको कीर्तिमानलाई तोडेका हुन् । हेनरी कामराले १९९९ देखि २००८ सम्मको अवधिमा ९९ क्याप जित्दै २९ गोल गरेका थिए । २०१२ देखि सेनेगलको राष्ट्रिय टोलीमा रहेका मानेले ९० खेलमै ३२ गोल गर्दै कीर्तिमान आफ्नो नाममा लेखाएका हुन् ।

बेनिनविरुद्ध खेलको १२औं मिनेटमा पेनाल्टीमार्फत गोल गर्दै हेनरी कामराको कीर्तिमान तोडे । त्यसपछि मानेले २२औं र ६०औं मिनेटमा गोल गर्दै ह्याट्रिक पुरा गरेपछि सर्वाधिक गोलकर्तामा ३ गोलको अग्रता बनाउन सफल भयो ।

लिभरपुलमा मानेको सम्झौता एक वर्ष बाँकी रहेको छ । तर, मानेले लिभरपुल छाड्ने मनासय बनाएका छन् । बिल्डका अनुसार माने बुन्डेसलिगा क्लब बायर्न म्युनिखसँग नजिकिएका छन् ।

मानेको लागि फ्रान्सेली क्लब पीएसजीले आकर्षक प्रस्ताव अघि सारेको छ । तर, माने बायर्नमा जान उत्सुक छन् । बायर्नले आफ्ना प्रमुख फरवार्ड रोबर्ट लेवान्डोस्कीलाई गुमाइसकेको अवस्थामा मानेलाई नै अनुबन्ध गर्ने योजना बनाइरहेको छ ।