एजेन्सी – अर्काे वर्ष (२०२३) मा आइभोरी कोस्टमा हुने भनिएको अफ्रिका कप अफ नेसन्स १ वर्ष पछि सरेको छ । मौसमलाई मध्यनजर गर्दै अफ्रिका कप अफ नेसन्स १ वर्षपछि सारिएको अफ्रिकन फुटबल कन्फेडेरेसन (काफ) ले जनाएको छ ।

अब अफ्रिका कप अफ नेसन्स सन् २०२४ मै आइभोरी कोस्टमा हुनेछ । यसअघि अफ्रिका कप अफ नेसन्स सन् २०२३ को जुन–जुलाईमा आयोजना हुने तय भएको थियो ।

कन्फेडेरेसन अफ अफ्रिकी फुटबल (क्याफ) का अध्यक्ष प्याट्रिस मोत्सेपेले जुन–जुलाईमा आइभोरी कोस्टमा अत्याधिक वर्षा हुने भएका कारण जोखिम नमोल्ने बताएका छन् । अब अफ्रिका कप अफ नेसन्स जनवरी–फेब्रुअरीमा हुनेछ ।

यसको अर्थ गत यसै वर्ष क्यामरुनमा भएको प्रतियोगितापछि लगातार दोस्रोपटक अफ्रिका कप अफ नेसन्स जनवरी–फेब्रुअरीमा हुनेछ । यो वर्ष इजिप्टलाई हराउँदै सेनेगल च्याम्पियन बनेको थियो । यस वर्ष विश्वकप फुटबल पनि नोभेम्वर डिसेम्वरमा हुँदैछ ।

काफले २०१७ मा युरोपियन क्लबहरु र खेलाडीका कारण जनवरी–फेब्रुअरीमा हुँदै आएको अफ्रिका कप अफ नेसन्स जुन जुलाईमा सार्ने निर्णय गरेको थियो । ‘युरोपियन क्लबहरूको कारण जनवरी हाम्रो लागि उपयुक्त समय होइन । तर यो हामीसँग एक मात्र विकल्प हो ।’ मोत्सेपेले थपे ।