एजेन्सी – स्पेनिस क्लब रियल म्याड्रिडले क्लबमा रहेका आफ्ना खेलाडीहरुको सम्झौता नविकरणलाई निरन्तरता दिइरहेका छन् । यसै क्रममा रियलले ब्राजिली सेन्टर ब्याक एडर मिलिसाओको सम्झौता नविकरण गरेको छ ।

रियलले मिलिसाओको रिलिज क्लज १ हजार मिलियन युरो राख्दै २०२८ सम्मको सम्झौता नविकरण गरेका हुन् । रियलले यसअघि भेट्रान मिडफिल्डर लुका मोड्रिच, भिनिसियस जुनियर र रोड्रिगोको सम्झौता नविकरण गरिसकेको छ । मिलिसाओ २०१९ को विन्टरमा पोर्चुगिज क्लब पोर्टाेबाट रियल जाने पक्का भएको थियो ।

रियलले समर ट्रान्सफरमा ५० मिलियन युरोमा ६ वर्षको लागि अनुबन्ध गरेको थियो । पोर्टाे बसाईको एक सिजनमै उनी रियलको नजरमा परेका हुन् । रियलमा तीन सिजन बिताउँदा २४ वर्षीय मिलिसाओले ९१ खेलमा ४ गोल गरेका छन् ।

तत्कालिन कप्तान सर्जियो रामोस र राफायल भरान रहँदा उनले रियलमा सुरुवाती सिजनमा विरलै अवसर पाए । २०२०–२१ को सिजनमा रामोस र भरान घाइते भएको अवस्थामा मौका पाएका मिलिसाओले त्यसयता लगातार पहिलो रोजाईमा मौका पाइरहेका छन् । उनी रियलको प्रमुख खेलाडीको रुपमा स्थापित भइसकेका छन् ।

रियलले यि चार खेलाडीसँगै करिम बेन्जेमा, एन्ड्री लुनिन, फेडे भाल्भेर्डे र गोलरक्षक थिवाउट कोर्टुवाको पनि सम्झौता नविकरण गर्ने तयारी गरिरहेको छ । २०१८ देखि ब्राजिलको टोलीमा रहेका मिलिसाओले २२ क्याप जित्दा एक अन्तर्राष्ट्रिय गोल गरेका छन् ।