एजेन्सी – डेनिस मिडफिल्डर क्रिस्टियन एरिक्सन इंग्लिस प्रिमियर लिग क्लब म्यानचेस्टर युनाइटेडमा आबद्ध हुने पक्का भएको छ ।

प्रिमियर लिग क्लब बेन्टफर्डसँगको सम्झौता सकिएपछि उनलाई युनाइटेडले ३ वर्षको लागि सम्झौता गर्न गरेको प्रस्तावलाई मौखिक सहमति जनाएका छन् । यसबारे क्लब र एरिक्सनले यसै साता आधिकारिक धारणा सार्वजनिक गर्नेछन् ।

ब्रेन्टफर्डमा ३० वर्षीय एरिक्सनको सम्झौता यो सिजनको अन्त्यसँगै सकिएपछि उनी फ्रि एजेन्ट बनेका थिए । उनी मेडिकलका लागि ओल्ड ट्राफोर्ड पुगिसकेका छन् । युनाइटेडका प्रशिक्षक एरिक टेन ह्यागले यस समरमा सम्झौता गर्ने उनी दोस्रो खेलाडी बन्नेछन् ।

एरिक्सनलाई अनुबन्ध गर्न उनको पूर्व क्लब टोटेनहम हटस्परले पनि चासो देखाएपनि उनी युनाइटेड जाने पक्का भएका हुन् ।सन् २०१३ देखि ७ वर्षसम्म लगातार टोटेनहमबाट खेलेका उनी ६ महिनाको सम्झौता बाँकी छँदै उनी २०२० मा इटालियन क्लब इन्टर मिलानमा झन्डै ५ वर्षको सम्झौता गरेका थिए ।

इन्टरले उनलाई २०२१ मा बेच्ने सुचीमा राखेको थियो । सोही वर्ष भएको युरो २०२० दौरान हृदयघातका कारण क्लबले उनलाई खेल्न नसक्ने सुचीमा राखेको थियो । हृदयघातका कारण मैदानमै ढलेका एरिक्सनको मुटुको शल्यक्रियाको ६ महिनापछि सामान्य अभ्यासमा फर्किएका थिए ।

ब्रेन्टफर्डबाट उनले ११ खेलमा १ गोल गरेका छन् । इन्टर मिलानबाट दुई सिजनमा उनले ६० खेलमा ८ गोल गरेका थिए । टोटेनहममा ७ सिजन रहँदा एरिक्सनले ३०५ खेलमा ६९ गोल गरेका छन् ।

हृदयघातको झण्डै २ वर्षपछि एरिक्सनले अन्तर्राष्ट्रिय फुटबलमा पनि पुनरागमन पनि गरिसकेका छन् । एरिक्सनले गत मार्चमा नेदरल्यान्ड्सविरुद्ध खेलेका थिए । २०१० देखि डेनिस टिममा रहेका एरिक्सनले ११५ क्याप जित्दा ३८ अन्तर्राष्ट्रिय गोल गरेका छन् ।