एजेन्सी – फ्रान्सेली लिग वान क्लब पेरिस सेन्ट जर्मेन (पिएसजी) ले क्रिस्टोफ गाल्टिएरलाई मुख्य प्रशिक्षकमा नियुक्त गरेको छ । अर्जेन्टिनी प्रशिक्षक माउरिसियो पोचेटिनोलाई बर्खास्त गरेलगत्तै पिएसजीले गाल्टिएरलाई २ वर्षको लागि मुख्य प्रशिक्षकमा नियुक्त गरेको हो ।

उनी २०२४ को सिजनको अन्त्यसम्म पार्क डेस प्रिन्सेसमा रहनेछन् । ५५ वर्षीय फ्रान्सेली पुर्व डिफेन्डर गाल्टिएर गत सिजन नै निसको प्रशिक्षक बनेका थिए । लिग वानमा पाँचौं र फ्रेन्च कपमा उपविजेता बनेपछि उनले गत महिना निस छाडेको घोषणा गरेका थिए ।

त्यसपछि उनलाई पिएसजीको प्रशिक्षक बन्ने ढोका खुलेको थियो । २०२१ मा लिललाई लिग वानको उपाधि दिलाएका गाल्टिएर सन् २०११ पछि पिएसजीको सातौं प्रशिक्षक बनेका छन् ।

‘म पेरिस सेन्टजर्मेनमा सामेल हुन पाउँदा खुसी छु, म अध्यक्ष नासेर अल–खेलाफी, फुटबल सल्लाहकार लुइस क्याम्पोस र क्लबलाई मेरो विश्वासको लागि धन्यवाद दिन चाहन्छु ।’ उनले भने, ‘पिएसजी युरोपको सबैभन्दा प्रतिस्पर्धी र शानदार टोली हो । म यो असाधारण टोलीलाई प्रशिक्षण गर्ने जिम्मेवारीहरूबारे पूर्ण रूपमा सचेत छु ।’

यो एक दशकमा पिएसजीलाई लिग वानको उपाधिबाट रोक्ने दुई प्रशिक्षकमध्ये गाल्टिएर एक हुन् । सन् २०१६–१७ मा लियोनार्दाे जार्डिमले मोनाकोलाई तथा २०२०–२१ म गाल्टिएरले लिलको लागि पिएसजीबाट लिग वानको उपाधि खोसेको थियो ।
उनले निसमा १२ महिना बिताउनुअघि मे २०२१ मा लिललाई अप्रत्याशित लिग वानको उपाधि दिलाएर राजीनामा दिएका थिए । उनले लिलअघि सेन्ट–इटिएनको पनि प्रशिक्षक रहेका थिए ।

पिएसजीमा पोचेटिनोको सम्झौता अझै १ वर्ष अर्थात २०२३ को जुनसम्म रहेपनि उनी बर्खास्तीमा परेको हो । च्याम्पियन्स लिगको प्रि–क्वाटरफाइनलबाटै बाहिरिनु पोचेटिनो बर्खास्तीको कारक बनेको छ । पिएसजीले आफ्ना फरवार्ड केलियन एमबाप्पेको सम्झौता नविकरण गरेपछि प्रशिक्षक परिवर्तनको चर्चा चल्दा उनी नयाँ सिजनको लागि प्रि–सिजन अघि बर्खास्तीमा परेका हुन् ।

पीएसजीले आफ्नो सामाजिक सञ्जाल च्यानलमा आधिकारिक विज्ञप्ति जारी गर्दै पोचेटिनो बाहिरिएको पुष्टि गरेको छ । ‘पेरिस सेन्ट जर्मेनले पुष्टि गरेको छ कि मौरिसियो पोचेटिनोले क्लबमा आफ्नो भूमिका समाप्त गरेको छ ।’ विज्ञप्तिमा भनिएको छ, ‘क्लबले मौरिसियो पोचेटिनो र उनका कर्मचारीहरूलाई उनीहरूको कामको लागि धन्यवाद दिन चाहन्छ र भविष्यको लागि शुभकामना दिएको छ ।’

पोचेटिनोले पिएसजीलाई फ्रेन्च लिग वानसँगै कप दि फ्रान्स र ट्रफी डेस च्याम्पियन जिताएका छन् । तर, खेलाडी अनुबन्धमा मोटो रकम खर्चिएको पिएसजीसँग युवा स्टार केलियन एमबाप्पे र ब्राजिली नेयमारसँगै अर्जेन्टिनी लियोनेल मेस्सीको साथ रहपनि टोली प्रि–क्वाटरफाइनलबाटै बाहिरिएको थियो ।

पोचेटिनोको नेतृत्वमा पिएसजीले ९५ खेल खेलेको छ । जसमा ५५ जित, १५ बराबरी र १४ हारको नतिजा छ । पिएसजीले नयाँ प्रशिक्षकका रुपमा स्टोफे गाल्टिएरलाई अनुबन्ध गर्ने तयारी गरिरहेको छ ।