एजेन्सी – युरोपेली च्याम्पियन रियल म्याड्रिडले पछ्याइरहेका अमेरिकी युवा गोलरक्षक ग्याब्रिएल सोल्निना इंग्लिस क्लब चेल्सीमा अनुबन्धित हुने भएका छन् ।

अमेरिकाको मेजर लिग सकरको सिकागो फाएरबाट खेल्दै आएका सोल्निनालाई चेल्सीले १० मिलियन युरो खर्चेर अनुबन्ध गर्ने भएको हो । चेल्सीका नयाँ मालिक टड बोहलीले व्यक्तिगत रुपमा नै अमेरिकी क्लबसँग सम्पर्क गर्दै खेलाडी भित्र्याउन मौखिक सम्झौता गरिसकेका छन् । चेल्सीले उनलाई यस सिजन सिकागो फाएरमा नै लोनमा पठाउनेछ ।

सोल्निना प्रिमियर लिगको शीर्ष ६ क्लबमा आबद्ध हुने तेस्रो अमेरिकी गोलरक्षक समेत बन्नेछन् । यसअघि ज्याक स्टेफन म्यानचेस्टर सिटीबाट खेल्दै आएका छन् । त्यस्तै म्याट टर्नर पनि यसै सिजन आर्सनलबाट खेल्ने तयारीमा छन् ।

मात्र १८ वर्ष पुगेका सोल्निनाको उचाई ६ फिट ४ इन्च रहेको छ । केहि साताअघि रियल म्याड्रिडले उनलाई भित्र्याउन प्रयास गरेपनि सिकागोले उक्त प्रस्ताव नकारेको थियो । सोल्निनाका लागि चेल्सीले राम्रो प्रस्ताव गरेसँगै एक सिजन अमेरिकामै रहन दिने भएपछि क्लब राजी भएको हो ।

सोल्निनाले सन् २०२१ मा सुरुवाती रोजाइमा खेलेदेखि क्लबका लागि ३० खेलमा ११ क्लिन सिट राखेका छन् । क्लबको कमजोर नतिजाका बाबजुद पनि सोल्निनाको प्रदर्शनले समर्थकको मन जितेको छ ।