एजेन्सी – प्रि-सिजनको मैत्रीपूर्ण खेल अन्तर्गत म्यानचेस्टर युनाइटेडले लिभरपुलमाथि फराकिलो जित दर्ता गरेको छ । थाइल्याण्डको बैंककस्थित राजामंगाला मैदानमा भएको खेलमा युनाइटेडले ४-० ले विजयी भयो ।

पहिलो हाफमा ३-० को अग्रता लिएको युनाइटेडले दोस्रो हाफमा पनि १ गोल थपेको थियो । खेलको १२ औं मिनेटमा जेडन सान्चोले युनाइटेडलाई सुरुवाती अग्रता दिलाएका थिए । ब्रुनो फर्नान्डेसको पासलाई लिभरपुलको डिफेन्सले राम्रोसँग क्लियर गर्न नसक्दा सान्चोले गोल गरेका थिए ।

खेलको ३० औं मिनेटमा युनाइटेडले मिडफिल्डर फ्रेडको गोलमा अग्रता दोब्बर पार्यो । एन्थोनी मार्सियलसँग उत्कृष्ट समन्वय गर्दै फ्रेडले गोल गरेका थिए । उनले पेनाल्टी क्षेत्रको ठिक बाहिरबाट गरेको चिप प्रहारलाई ब्राजिलियन गोलरक्षक एलिसनले रोक्ने अवसर पाएनन् ।

त्यसको ३ मिनेटपछि नै मार्सियलले ३-० को अग्रता दिलाए । लिभरपुलले १० खेलाडी परिवर्तन गरेको केहि मिनेटमा नै उनले गोल गरेका थिए । मार्सियलले बल खोस्दै काउन्टर अट्याकमा अघि बढेको युनाइटेडका लागि उनले वन भर्सेस वनको स्थितिमा गोलरक्षक एलिसनलाई चिप गर्दै गोल गरेका थिए ।

दोस्रो हाफको ७६ औं मिनेटमा फाकुन्डो पेलिस्त्रीले युनाइटेडलाई ४-० ले अघि बढाए । एरिक बेलीले सुरु गरेको काउन्टर अट्याकमा एमड डियालो र पेलिस्त्रीको समन्वय मिल्दा गोल सम्भव भएको थियो । पेलिस्त्रीले पेनाल्टी क्षेत्रभित्र गोलरक्षकविरुद्ध ३ युनाइटेड खेलाडी रहेको अवस्थामा गोल गरेका थिए ।

प्रशिक्षक एरिक टेन हागको पहिलो खेलमा युनाइटेडले उत्कृष्ट प्रदर्शन समेत गर्यो । निकै छरितो फुटबल खेलेको युनाइटेडले युवा खेलाडीलाई पनि अवसर दिएको थियो । स्टार फरवार्ड क्रिस्टियानो रोनाल्डो अनुपस्थित रहेपनि युनाइटेडको प्रदर्शन तारिफयोग्य थियो ।

यता लिभरपुलले भने केहि आक्रमणमा अवसर सिर्जना गरेपनि गोल फर्काउन भने सकेन । नयाँ फरवार्ड डार्विन न्युनेजले सुन्दर अवसर खेर फाल्दा मोहमद सलाहको प्रहार पोस्टमा लागेको थियो । लिभरपुलले खेल अवधिभर २ दर्जन बढी खेलाडी प्रयोग गरेको थियो ।