एजेन्सी – अर्जेन्टिनी फरवार्ड पाउलो डिबाला फ्रि–ट्रान्सफरमा इटालियन क्लब रोमामा अनुबन्धित भएका छन् । अर्काे इटालियन क्लब युभेन्ट्ससँगको सम्झौता अवधि सकिएसँगै २८ वर्षीय डिबालाले रोमामा ३ वर्षको सम्झौता गरेका हुन् ।

सन् २०१५ मा पालेरमोबाट युभेन्ट्स आएका डिबालाले यस अवधिमा २९३ खेल खेल्दा ११५ गोल गरेका छन् । उनले युभेन्ट्सबाट पाँचपटक सिरी ‘ए’ को उपाधि जितेका छन् ।

‘मलाई यो सम्झौतामा हस्ताक्षर गर्न पाउँदा खुसी छु,’ डिबालाले भने, ‘रोमाले देखाएको गतिले क्लबले मलाई कति चाहन्छ भन्ने कुरा देखियो । म रोमामा सामेल भइसकेको छु । एक अब्बल प्रशिक्षक जोसे मौरिन्होसँग काम गर्न मलाई अवसर छ ।’

रोमाले मौरिन्होको नेतृत्वमा गत सिजन सिरी ‘ए’ मा छैटौं स्थान हासिल गरेको थियो । युरोपा कन्फ्रेन्स लिग जित्दै रोमा पहिलोपटक युरोपेली ट्रफी उचाल्न सफल भएको थियो ।

‘पाउलो एक विश्व प्रसिद्ध खेलाडी हुन् । उनले प्रमुख ट्रफीहरु जितेका छन् । उनले त्यो ट्रफीलाई रोमामा ल्याउन मद्दत गर्नेछन् । म विश्वस्त छु कि उनको आगमनले हाम्रो टोली अझ बलियो र प्रतिस्पर्धात्मक हुनेछौं,’ रोमाका महाप्रवन्धक पिन्टोले भने ।

डिबाला यो समरमा रोमामा अनुबन्ध हुने चौथो खेलाडी बनेका छन् । यसअघि रोमाले नेमान्जा माटिच, माएल स्विलार र जेकी सेलिक अनुबन्ध गरिसकेको छ ।

रोमाले डिबालाले आफ्नो मनपर्ने जर्सी नम्बर २१ नै लगाउनेछन् । यसअघि यो नम्बर गत महिना अनुबन्ध भएका माटिचले लगाउने भनिएको थियो । अब माटिचले ८ नम्बर जर्सी लगाउनेछन् ।

डिबालाले अर्जेन्टिनाका लागि ३४ खेलमा ३ अन्तर्राष्ट्रिय गोल गरेका छन् । पछिल्लोपटक उनले गत जुनमा वेम्बलीमा भएको फाइनलिसिमामा इटालीविरुद्ध गोल गरेका थिए ।