काठमाडौैं (हाम्रो खेलकुद)– अर्को महिना बंगलादेशिविरुद्ध हुने मैत्रीपूर्ण खेलका लागि राष्ट्रिय पुरुष फुटबल टोलीको बन्द प्रशिक्षण विराटनगरमा हुने भएको छ ।

बन्द प्रशिक्षणका लागि होटलको आवश्यकता रहेको भन्दै अखिल नेपाल फुटबल संघ (एन्फा) ले बुधबार सुचना सार्वजनिक गरेको छ । जसमा नेपाली टोलीले भदौ २० गतेदेखि असोज ७ गते सम्म विराटनगरमा प्रशिक्षण हुने उल्लेख गरिएको छ । विराटनगरमा बन्द प्रशिक्षणमा होटल आवश्यकता भएकोले इच्छुक होटल व्यवसायीले तीन दिन भित्र सिलबन्दी प्रस्ताव पठाउन एन्फाले भनेको छ ।

जसमा ३१ खेलाडीको १४ डबल र ३ सिंगल कोठाको आवश्यता रहेको सुचनामा उल्लेख गरिएको छ । राष्ट्रिय फुटबल टोलीका कार्यवहाक मुख्य प्रशिक्षक प्रदीप हुमागाईंले मंगलबार दोस्रो चरणमा ४० बाट ३० खेलाडीको छनोट गरेका थिए । नेपाल र बंगलादेशबीच मैत्रीपूर्ण खेल दशरथ रंगशालामा असोज ११ गते हुनेछ ।

बन्द प्रशिक्षणमा बोलाइएका ३० खेलाडी

गोलकिपर– किरण चेम्जाङ, विकेश कुथे, विशाल श्रेष्ठ, दीप कार्की

रक्षक–अनन्त तामाङ, रोहित चन्द, विकास तामाङ, विकास खवास, दीनेश राजवंशी, सुमन अर्याल, रञ्जित धिमाल

मिडफिल्ड– तेज तामाङ, सेसेहाङ आङदेम्बे, विशाल राई, एरिक विष्ट, मनीष डाँगी, सुरज ज्यू ठकुरी, सुनिल बल, आयुष घलान, सुजल श्रेष्ठ, आभाष लामिछाने, सुदीप गुरुङ, सन्जोग राई, अन्जन विष्ट

फरवार्ड– विमल घर्तीमगर, रितिक खड्का, अभिषेक रिजाज, भरत खवास, आशिष चौधरी, नवयुग श्रेष्ठ