काठमाडौं (हाम्रो खेलकुद) – छैटौं महिला साफ च्याम्पियनसिप २०२२ अन्तर्गत समूह ए को दोस्रो खेलमा बंगलादेशले माल्दिभ्सलाई हराएको छ । पहिलो हाफको ३ गोलको मदतले बंगलादेश ३-० ले विजयी भएको हो ।

एकपक्षीय खेलमा बंगलादेशकी कप्तान सविना खातुनले दुई गोल गरेकी छिन् । अर्को गोल मसुरा प्रविनको नाममा रहेको छ । बंगलादेशले खेलको सुरुवातदेखि नै माल्दिभ्सको पोस्टमा आक्रमण सुरु गरेको थियो । पटक पटक गोलको अवसर सिर्जना गरेपनि बंगलादेशका फरवार्डले सुरुवाती आधा घण्टामा गोल गर्न सकेनन् ।

दोस्रो हाफमा पनि बंगलादेशले सुरुवातदेखि नै आक्रमण बुन्यो । पूरै दोस्रो हाफको अधिकांश समय माल्दिभ्सकै हाफमा खेल चलेको थियो । बंगलादेशले पटक पटक आक्रमण गरेपनि विपक्षी गोलरक्षकलाई बिट गर्न सकेन । माल्दिभ्सले दोस्रो हाफमा एउटा पनि आक्रमण बुन्न सकेको थिएन ।

कप्तान सविना खातुनले खेलको ३१ औं मिनेटमा सुन्दर गोल गर्दै बंगलादेशलाई अग्रता दिलाइन् । सन्जिदा अख्तरको पास लिएपछि उनले झन्डै ३५ यार्ड टाढाबाट गरेको प्रहार माल्दिभ्सकी कप्तान तथा गोलरक्षक अमिनाथ लिजाले ढिलो ठम्याएपछि गोल भएको थियो ।

बंगलादेशका लागि ३४ औं मिनेटमा मसुरा प्रविनले अग्रता दोब्बर पारिन् । पेनाल्टी क्षेत्रभित्र बल क्लियर नभएको अवस्थामा उनले खुला बललाई पोस्टको दिशा दिएकी थिइन् ।

खेलको ४० औं मिनेटमा कप्तान सविनाले व्यक्तिगत दोस्रो गोल गरिन् । गोलरक्षक अमिनाथले मारिया मान्दाको पहिलो प्रहार बचाएपनि रिबाउन्डमा उनले दोस्रो बारमा सहजै गोल गर्दै ३-० को अग्रता दिलाइन् ।

दोस्रो हाफमा पनि बंगलादेशले आफ्नो आक्रमण जारी राख्यो । ६० औं मिनेटमा कृष्णारानी सरकारको क्रसमा सविनाको भली प्रहार पोस्टभन्दा थोरै परबाट बाहिरियो । ८६ औं मिनेटमा मारिया मान्दाले तीन खेलाडी छलाएर पेनाल्टी क्षेत्र बाहिरबाट गरेको प्रहार आफ्नै खेलाडीलाई लाग्दै बाहिरिएको थियो ।

यसअघि समूहको पहिलो खेलमा भारतले पाकिस्तानलाई ३-० ले हराएको थियो । दशरथ रंगशालामा खेलको चौथो मिनेटमा नै पाकिस्तानले अग्रता लिने सुवर्ण अवसर खेर फाल्यो । जुल्फिया नाजिरको पासमा नादिया खानले वन भर्सेस वनको अवस्थामा गोल गर्न सकिनन् । जुल्फियाले अफसाइड ट्रयाप बिट गर्दै दिएको पासमा नादियाले पेनाल्टी क्षेत्रको दायाँ भागबाट गरेको प्रहारले गोलरक्षकलाई पनि समस्या दिन सकेन ।

खेलको २० औं मिनेटमा भारतले अग्रता लियो । भारतकी सन्ध्या रंगनाथनले बायाँ विंगबाट गरेको क्रस गोलरक्षक सहिदा महापाराले बचाएकी थिइन् । तर रिबाउन्डमा आएको बल कप्तान मारिया खानलाई लाग्दै आफ्नै पोस्टमा छिरेको थियो ।

पहिलो गोल गरेको दुई मिनेट नबित्दै भारतले अग्रता दोब्बर पार्यो । दाङमेइ ग्रेसले पेनाल्टी क्षेत्र भित्रबाट गोल गर्दै २-० को अग्रता दिलाइन् । उनले अन्जु तामाङको चलाखीपूर्ण पासलाई नियन्त्रणमा लिँदै वन भर्सेस वनमा गोल गरेकी थिइन् ।

५९ औं मिनेटमा कप्तान मारियाको प्रहार भारतकी गोलरक्षक अदिति चौहानले सहजै बचाइन् । लगत्तै ६१ औं मिनेटमा जुल्फियाको क्रस सिधै पोस्टतर्फ गएपनि अदितिले दोस्रो प्रयासमा बचाइन् । ६५ औं मिनेटमा रन्जना चानुको क्रसमा पाकिस्तानको डिफेन्स लाइन र गोलरक्षक बिट भएपनि सौम्या गुगुलगोठले बल नियन्त्रणमा लिने क्रममा हातले छुँदा रेफ्रीले फल दिएकी थिइन् ।

७३ औं मिनेटमा भारतले अग्रता बढाउने अर्को अवसर गुमायो । ग्रेसको क्रसमा गोलरक्षक बिट भएपनि किरण पिस्दाले खाली पोस्टमा बललाई गोल गर्न सकिनन् । लगत्तै ऋतु रानीले झन्डै ३० यार्ड टाढाबाट गरेको प्रहार पोस्ट नजिकबाट बाहिरियो । ८० औं मिनेटमा किरणको पासमा अन्जुको प्रहारले पोस्टको दिशा लिन सकेन ।

इन्ज्युरी समयमा भारतले अर्को गोल थप्यो । रन्जना चानुको क्रसमा सौम्या गुगुलगोठले गोल गर्दै ३-० को जित पक्का गरिन् ।

समूहको अंक तालिकामा भारत र बंगलादेश दुवैको ३-३ अंक भएको छ । दुवैको गोल अन्तर पनि समान छ । प्रतियोगिता अन्तर्गत विहीबार कुनै खेल हुने छैन ।