काठमाडौं (हाम्रो खेलकुद)– दशरथ रंगशालामा जारी महिला साफ च्याम्पियनसिपमा दुई वटा इतिहास बनिसकेका छन् । यसै सिलसिलामा नेपाल शुक्रबार साँझ ५:३० बजे सेमिफाइनल खेल्न उत्रँदा अर्को इतिहास रच्ने सुरमा हुनेछ ।

साफको १२ वर्षे इतिहासमा भुटानले पहिलो जित निकाल्दै सेमिफाइनलको यात्रा तय गरेको छ । श्रीलंकालाई ५–० ले हराएबाट पनि भुटानले फुटबलमा गरेको प्रगती बुझ्न सकिन्छ ।

समूह चरणकै अर्को खेलमा बंगलादेशले भारत माथि पहिलो पटक जित निकाल्दै इतिहास रचेको छ । जारी साफ च्याम्पियनसिपमा सबैभन्दा सशक्त देखिएको बंगलादेशले भारतलाई ३–० ले हराएको थियो । भारतले हारेको मात्र होइन निकै खराब प्रदर्शनका साथ खेल गुमाउनु परेको थियो ।

अब इतिहास रच्ने पालो नेपालको छ । तर त्यसमा नेपाली टोली सफल हुन्छ वा हुँदैन त्यसका लागि भने शुक्रबार साँझ सम्म कुर्नुपर्नेछ । भारतलाई साफ च्याम्पियनसिपमा यसअघि कसैले हराउन नसकेको अवस्थामा बंगलादेशले हरायो । घरेलु मैदानको साथ र भारतपछि बढी फाइनल खेल्ने नेपालले पनि अब जित्न नसक्ने भन्ने हुँदैन । तर, त्यसका लागि बंगलादेशले जस्तै सशक्त प्रदर्शन गर्नुपर्ने हुन्छ ।

बंगलादेशले नतिजाले मात्र होइन प्रदर्शनले पनि धेरैलाई लोभ्याएको थियो । साफमा भारतको महिला टोलीलाई हराउने बंगलादेश पहिलो टोली बनेको छ । अब नेपालले भारतलाई पहिलो पटक हराउन सक्यो भने साफ च्याम्पियनसिपमा अर्को इतिहास हुनेछ । अघिल्ला ५ मध्ये ४ संस्करणमा फाइनल खेल्दा नेपाल भारतसँग पराजित भएको थियो । फाइनल नपुगेको एकमात्र संस्करण सन् २०१६ को सेमिफाइनलमा पनि भारतसँगै पराजित भएर घर फर्केको थियो ।

साफ च्याम्पियनसिपमा नेपाल अहिले सम्म भारतबाहेक कुनै टोलीसँग हारेको छैन । यसपटक पनि भारतलाई हराउन नसके टोली च्याम्पियन बन्न सक्दैन । साफ च्याम्पियनसिपको इतिहासमा दोस्रो पटक नेपालले सेमिफाइनलमा भारतको सामना गर्दैछ । त्यति बेला भारतीय भूमिका सेमिफाइनलमा हारेको नेपालले यसपटक घरेलु मैदानको फाइदा उठाउँदै भारतको चुनौती पार गर्नुपर्नेछ ।

नेपाली टोलीका मुख्य प्रशिक्षक कुमार थापाले भारतलाई अनुभवी टोली बताएका थिए । उनले सेमिफाइनलमा भारत आएपनि आफूहरुको खेलको रणनीति र शैलीमा भने कुनै परिवर्तन नहुने बताएका थिए । थापासँगको अर्को संयोगमा भनेको उनले पछिल्लो पटक साफ च्याम्पियसिपमा नेपाली टोली भारतसँग सेमिफाइनलमै पराजित भएको थियो । थापा यसपटक त्यो छविलाई बदल्न प्रयासमा हुनेछन् ।

बंगलादेशसँग अप्रत्यासित हार बेहोरेको भारतका लागि नेपालसँगको खेल प्रतिष्ठाको लडाईं पनि हुनेछ । लगातारको च्याम्पियन कुनै पनि मुल्यमा नेपालसँग हार नखानका लागि प्रयासरत रहनेछ । बंगलादेशसँगको खेल उनीहरुका लागि खतराको संकेत हो । टोलीका प्रशिक्षक सुरेन क्षेत्रीले बंगलादेशसँगको हारमा आफ्नो टोलीको खराब प्रदर्शन मानेका थिए । नेपाल भारतपछिको बलियो टोलीको रुपमा जानिन्छ । बंगलादेशसँगै प्रदर्शन दोहाराएको अवस्थामा नेपालले पनि भारतलाई जित्ने सम्भावना रहन्छ ।

प्रशिक्षक क्षेत्रीले घरेलु समर्थकबीच नेपालविरुद्ध खेल्न कठिन हुने बताउँछन् । ‘नेपालसँगको खेल सधैं कठिन हुने गर्दछ । अझ नेपालमै आएर खेल्न थप गाह्रो हुन्छ किनभने समर्थक पनि साथमा हुन्छन् । हामीले यसअघि विराटनगर पनि खेलेका थियौं । काठमाडौंमा अझ धेरै समर्थक हुनेछन्, उनले भनेका थिए, तर हामीसँग पुरानो अनुभव छ । नेपाललाई नेपालमै हराएका खेलाडी पनि टोलीमा छन् । अब हाम्रो ध्यान अब सेमिफाइनलमा हुनेछ ।’

उपाधिका लागि एक कदम अघि बढ्न र भारतविरुद्ध ऐतिहासिक जित दर्ता गराउने दुवै अवसर नेपालसँग हुनेछ । त्यसका लागि कस्तो प्रदर्शन गर्नेछ त्यो नेपाली समर्थकको चासोको विषय हुनेछ ।

साफ च्याम्पियनसिपमा नेपाल र भारतबीचको नतिजा

वर्ष नेपाल भारत खेल

२०१०, ०-१ फाइनल

२०१२, १-३ फाइनल

२०१४, ०-६ फाइनल

२०१६, १-३ सेमिफाइनल

२०१९, ०-३ फाइनल

२०२२ ? ? सेमिफाइनल