एजेन्सी – महत्वपूर्ण जित निकाल्दै बोरुसिया डर्टमुन्ड जर्मन बुन्डेसलिगाको शीर्षस्थानमा उक्लन सफल भएको छ ।

घरेलु मैदानमा डर्टमुन्डले साल्केलाई १–० ले पराजित गर्दै शीर्षस्थानमा उक्लन सफल भएको हो । घरेलु मैदानमा डर्टमुन्डको जितमा युसोउफा मौकाकोले निर्धारित समयको खेल सकिन ११ मिनेट बाँकी रहँदा गरेको गोल नै निर्णायक बन्यो ।

यस जितसँगै डर्टमुन्ड ७ खेलबाट १५ अंक जोडेर शीर्षस्थानमा उक्लिएको छ । डर्टमुन्डले एक खेल कम खेलेको युनियन बर्लिन र फ्रेइवर्गलाई पछि पारेको हो । पराजित साल्के ६ अंक जोडेर १४औं स्थानमा रहेको छ ।

अर्काे खेलमा बोरुसिया मोन्चेनग्लाडवाकले आरबी लाइप्जिगलाई ३–० ले पराजित गरेको छ । मोन्चेनग्लाडवाकको जितमा जोनास होफमानले दुई तथा रामी बेन्सेबैनीले एक गोल गरे ।

यस जितसँगै मोन्चेनग्लाडवाक ७ खेलबाट १२ अंक जोडेर छैटौं स्थानमा उक्लिएको छ । पराजित लाइप्जिग ८ अंक जोडेर १२औं स्थानमा छ ।

बुन्डेसलिगाकै अर्काे खेलमा साविक विजेता बायर्न म्युनिखले सिजनको पहिलो हार बेहोरेको । सिजनको पहिलो हार बेहोर्ने क्रममा बायर्न घरेलु टोली अग्सवर्गसँग १–० ले पराजित भयो । हारसँगै बायर्नले शीर्षस्थानमा उक्लने अवसर गुमाएको छ ।