भक्तपुर (हाम्रो खेलकुद)– मध्यपुर थिमी नगरपालिकाले बी डिभिजन टोली मध्यपुर युथ एशोसियसनको संयोजनमा पहिलो पटक मध्यपुर थिमी वडा व्यापी लिग फुटबल प्रतियोगिता आयोजना गर्ने भएको छ ।

शनिबार सुरु भएर एक महिना सम्म चल्ने लिगको व्यवस्थापन, प्राविधिक सहयोग र संयोजन मध्यपुर युथ एशोसियसनले गर्नेछ शुक्रबार आयोजित पत्रकार सम्मेलनमा जानकारी गराइयो । मध्यपुर युथ एसोसिएसनका उपाध्यक्ष समेत रहेका प्रतियोगिता संयोजक अष्ट कवेका अनुसार लिगमा नगरपालिकाका सबै ९ वटाको सहभागिता रहनेछ । प्रतियोगिताको उद्घाटन खेल शनिबार वडा नं १ र ४ का बीचमा हुनेछ । सबैले एक अर्कासँग खेल्ने लिगमा कुल ३६ खेल हुनेछन् ।

प्रतियोगितामा सहभागी टोलीका सम्पूर्ण खेलाडी मध्यपुर थिमिका स्थायी बासिन्दा हुनेछन् । जुन वडाको खेलाडीको स्थायी बसोबास जुन वडामा हो त्यही वडाबाट सहभागिता जनाउनुपर्नेछ । लिगको विजेता टोलीले उपाधिसहित २ लाख ५० हजार, दोस्रो टोलीले १ लाख २५ हजार र तेस्रो हुने टोलीले ६० हजार रुपैयाँ प्राप्त गर्नेछ ।

प्रतियोगिताको अनुशासित टोलीलाई २५ हजारसहित फेयरप्ले अवार्ड प्रदान गरिने बताइएको छ । प्रतियोगिताका सर्वोत्कृष्ट खेलाडीले २० हजार तथा उत्कृष्ट गोलकिपर, मिडफिल्डर, डिफेण्डर र स्ट्राइकरले समान १० हजार रुपैयाँ पुरस्कार पाउनेछन् । प्रत्येक खेलको म्यान अफ दि म्याचलाई ट्रफी प्रदान गरिनेछ ।

प्रतियोगिताका लागि विभिन्न समिति गठन भएका छन् । लिग डाइरेक्टर र म्याच कमिस्नर एशोसियसनका अध्यक्ष समेत रहेका उपेन्द्रमान सिंह छन् । मनोज अधिकारीको संयोजकत्वमा स्वास्थ्य समिति, उज्वल श्रेष्ठको संयोजकत्वमा सुरक्षा समिति, हरिदास प्रजापतिको संयोजकत्वमा प्रचार प्रसार समिति, भेनु कोअर्डिनेटर राजेश श्रेष्ठ, अतिथी सत्कार समिति सुरेन्द्र श्रेष्ठ र सुनिल श्रेष्ठ, लजेष्टिक व्यवस्थापन ज्ञानु रञ्जित रहेका छन् ।