काठमाडौं (हाम्रो खेलाडी)– अखिल नेपाल फुटबल संघ (एन्फा) ले नेपाल सुपर लिग (एनएसएल) र सहिद स्मारक ए डिभिजन लिगको मिति तय गरेपनि फुटबल खेलाडीको पलायन भने रोकिएको छैन ।

पछिल्लो समय राष्ट्रिय फुटबल टोलीका नियमित सदस्यसँगै अन्य अधिकांश खेलाडीको गन्तव्य अष्ट्रेलिया रहँदै आएको छ । विदेशिने खेलाडीको लामो सूचीमा राष्ट्रिय टोलीबाट खेलिसकेका राजन गुरुङसहित मिक्छेन तामाङ, रुमेश बर्तौला, रवि थिङ र अमिर श्रेष्ठ थपिएका छन् ।

एपिएफ फुटबल क्लबका रक्षक राजनले असारमा सम्पन्न एएफसी एसियन कप छनोटमा पहिलो रोजाईमा नै खेलेका थिए । थ्री स्टारका मिडफिल्डर मिक्छेन १३ औं दक्षिण एसियाली खेलकुद (साग) का स्वर्ण पदक विजेता हुन् । उनले राष्ट्रिय टोलीबाट डेब्यू गरिसकेका थिए । रुमेशले च्यासल युथ क्लब, रविले एपिएफ र अमिरले जावलाखेल युथ क्लबबाट गत वर्षको लिग खेलेका थिए ।

पछिल्लो ५ महिनामा राष्ट्रिय टोली र ए डिभिजन लिगका दर्जन बढी खेलाडी अष्ट्रेलिया पुगेका छन् । राष्ट्रिय खेलाडी विमल राना, मिडफिल्डर हेमन्त थापा मगर साउनमा विदेशिएका थिए । त्यसअघि जेठमा राष्ट्रिय टोलीबाट खेलिरहेका सुमन लामा, आशिष लामा, सन्तोष तामाङ, दर्शन गुरुङ र नविन गुरुङ अष्ट्रेलिया पुगेका थिए । युवा गोलरक्षक रोहित कार्की पनि अघिल्लो महिना अष्ट्रेलिया पुगेका छन् ।

मिडफिल्डर हेमन गुरुङ, गोलकिपर एलन न्यौपाने, जगजित श्रेष्ठ र विमल बस्नेत लामो समय देखि अष्ट्रेलिया रहँदै आएका छन् । जगजित भने गत वर्ष लिग खेल्नका लागि स्वदेश फर्केका थिए । उनले हाम्रो खेलकुदसँग अन्तर्वार्ताका क्रममा नेपालमा लिग नहुँदा विदेशिनुको विकल्प नरहेको समेत बताएका थिए ।