एजेन्सी – इर्लिङ हालान्डले २ गोल गरेको च्याम्पियन्स लिगको खेलमा म्यानचेस्टर सिटीले कोपनहेगनलाई ५–० ले हराएको छ । घरेलु मैदानमा पहिलो हाफमै हालान्डले २ गोल गरेको खेलमा डाभिट खोचोलाभाले आत्मघाती, रियाद मेहराज र जुलियन अल्भारेजले गोल गरेका थिए ।

सहज जितका लागि सिटीले समूह जीमा शतप्रतिशत नतिजालाई निरन्तरता दिएको छ । टोलीलाई नकआउट चरणमा पुग्नका लागि अब मात्र २ अंकको आवश्यकता छ । सबै खाले प्रतियोगितामा गरि हालान्डको गोल संख्या १९ पुगेको छ । प्रिमियर लिगमा आइतबार म्यानचेस्टर युनाइटेडविरुद्ध ह्याट्रिक गरेका हालान्डले सातौं मिनेटमै पहिलो गोल गरेका थिए । जोआओ कासिलोको क्रसमा उनले पहिलो गोल गरेका थिए । उनको अर्को प्रहारलाई भने कोपनहेगनका गोलकिपरले रोकेका थिए ।

३२ औं मिनेटमा हालान्डले अर्को गोल थपे । सर्जियो गोेमेजको प्रहारलाई हालान्डले ट्याप गरेका थिए । ३९ औं मिनेटमा गोमेजको प्रहारमा दुई डिफेन्डराम डिफ्लेक्ट हुँदै आत्मघाती गोल भएको थियो । अन्तिम डिफ्लेक्ट खोचोलाभाको भएको थियो । अर्को ह्याट्रिक अवसर भएपनि हालान्डलाई दोस्रो हाफमा परिवर्तन गरिएको थियो ।

५५ औं मिनेटमा मेहराजले पेनाल्टीमा गोल गर्दै अन्तरलाई फराकिलो बनाएका थिए । एमिरिक लापोर्टेलाई मार्को स्टामिनिकले फाउल गरेपछि सिटीले पेनाल्टी पाएको थियो । ७६ र्औ मिनटमा अल्भारेजले गोल गरेका थिए । यो सिजन सिटीमा आएयता १२ खेलमा १९ गोल गरेका हालान्डले त्यसमध्येका १६ गोल पछिल्ला ८ खेलमा गरेका थिए ।

अंकतालिकामा सिटी ९ अंकसहित शीर्षस्थानमा छ भने हालान्डको पूर्व क्लब बोरुसिया डर्टमुन्ड ६ अंकसहित दोस्रो स्थानमा छ । सेभिल्ला र कोपनहेनको समान १ अंक छ ।