दिपेन्द्र पोखरेल
दुहबी – सातौं राष्ट्रिय खेलकुदअन्तर्गत महिला फुटबल उपाधिका लागि विभागिय डर्बीबीच प्रतिस्पर्धा हुनेछ । नेपाल पुलिस क्लब र शसस्त्र प्रहरी बलको एपिएफबीचको फाइनल सुनसरीस्थित दुहबी रंगशालामा शनिबार दिउँसो सुरु हुँदैछ ।
दुवै टोलीको वास्तविक परिक्षण फाइनलमै हुनेछ । दुवै टोली अपराजित रहँदै अन्तिम दुईमा पुगेका थिए । समूह चरणमा यी दुई टोली एकै समूहमा थिए । समूह चरणमा यी दुईबीचको खेल १–१ को बराबरी खेलेका थिए ।
दुवैले समूह चरणमा ३ खेलमा समान ७ अंक जोडेका थिए । गोलअन्तरमा मात्र दुई टोलीबीच फरक थियो । समूह चरणमा विजेता बन्ने क्रममा पुलिसले ३ खेलमा ८ गोल गर्दै १ गोल खाएको थियो । एपिएफले ८ गोल गर्दै २ गोल खाएको थियो ।
शुक्रबार भएको सेमिफाइनलमा पुलिसले मध्यमाञ्चललाई ५–० ले र एपिएफले अर्को विभागिय टोली त्रिभुवन आर्मी क्लबलाई ३–० ले हराएर एकअर्कोसँगको भेट पक्का गरेका थिए । महिला फुटबल पुस २ गतेबाट सुरु भएको थियो ।
