पोखरा (हाम्रो खेलकुद) – नवौं राष्ट्रिय खेलकुद अन्तर्गत पुरुष फुटबलको स्वर्ण पदक नेपाल एपिएफ क्लबले जितेको छ ।

निर्धारित ९० मिनेटको खेल गोलरहित बराबरीमा सकिएपछि खेल ३० मिनेटको अतिरिक्त समयमा लम्बिएको थियो । थप समयमा गोल हुन नसक्दा खेल टाइब्रेकरमा पुगेको थियो । टाइब्रेकर ४-४ को बराबरीमा पुग्दा सडन डेथमा आर्मीलाई हराउँदै एपिएफले स्वर्ण पदक जित्यो ।

टाइब्रेकरमा आर्मीका लागि नवयुग श्रेष्ठ र एपिएफका नविन लामाले पहिलो प्रहारमा गोल गरे । आर्मीका सेसेहाङ आङदेम्बेले दोस्रो प्रहार चुकाएर दोस्रो अवसर प्राप्त गरे, तर उक्त प्रहारलाई पनि एपिएफका गोलरक्षक राजु नगरकोटीले बचाए । एपिएफका आवास लामिछानेले गोल गर्दै अग्रता दिलाए । जर्जप्रिन्स कार्कीले गोल गरेपछि एपिएफका सनिश श्रेष्ठको प्रहार आकाशियो ।

आर्मीका सिमान्त थापा र एपिएफका सुदीप सिख्राकारले पनि गोल गरे । आर्मीका विवेक बस्नेतले पाँचौ प्रहारमा सफल हुँदा एपिएफका गोलरक्षक राजु नगरकोटीले पनि सहजै गोल गरे ।

सडन डेथमा आर्मीका विकास खवासले गोल गर्दा एपिएफका दीपेश धिमालले विकेश कुथुलाई बिट गरे । त्यसपछि आर्मीका सुमन अर्यालको प्रहार राजु नगरकोटीले रोक्दा विश्वास उदासले गोल गर्दै जित पक्का गरे ।

१४ औं मिनेटमा नवयुग श्रेष्ठको ओभरहेड किक बाहिरिएको थियो । ३२ औं मिनेटमा एपिएफका मणि कुमार राईको प्रहार आर्मीको गोलरक्षक विकेश कुथुले बचाएका थिए । ३५ औं मिनेटमा डिफेन्डर र गोलरक्षकबीच तालमेल नमिल्दा आर्मी गोल खानबाट बचेको थियो ।

५८ औं मिनेटमा नविन लामाको प्रहार सुमन अर्यालले गोल लाइनबाट हेडरमार्फत किलर गर्दै आर्मीको संकट टारे । त्यसअघि सोही मुभमा विक्कु तामाङको प्रहारलाई गोलरक्षक विकेशले अघि बढ्दै बचाए । ६१ औं मिनेटमा हरि कार्कीको प्रहारलाई विकेशले पन्च गर्दै बचाए ।

६७ औं मिनेटमा विकाश खवासको प्रहार पोष्ट नजिकैबाट बाहिरियो । ७० औं मिनेटमा जर्ज प्रिन्स कार्कीले सुवर्ण अवसर पाएपनि सदुपयोग गर्न सकेनन् ।

७९ अ‍ौं मिनेटमा दुवै टोली १० खेलाडीमा सिमित भए । एपिएफका प्रदीप लामा र आर्मीका पदम तामाङबीच धक्कामुक्की हुँदा रेफ्री नविन्द्र महर्जनले दुवैलाई रातो कार्ड दिए । ८५ औं मिनेटमा सिमन्त थापाको क्रसलाई सुदिल राईले पोष्ट नजिकै अवसर पाएपनि सदुपयोग गर्न सकेनन् । त्यसपछि गोल नहुँदा खेल अतिरिक्त समयमा लम्बिएको थियो ।

यो पनि : महिला फुटबलमा एपिएफलाई स्वर्ण