एजेन्सी – युरोपेली च्याम्पियन्स लिग अन्तर्गत समूह एफको खेलमा रियल म्याड्रिडले हार बेहोरेको छ । जर्मन टोली आरबी लाइप्जिगले रियललाई ३-२ ले पराजित गरेको हो ।

घरेलु मैदानमा लाइप्जिगले एक समय पहिलो हाफमा २-० को अग्रता लिएको थियो । खेलको १३ औं मिनेटमा जोसको भार्दिओलले गोल गर्दै लाइप्जिगलाई अघि बढाए । १८ औं मिनेटमा क्रिस्टोफर एनकुनकुले गोल गर्दै रियललाई स्तब्ध पार्ने संकेत दिएका थिए ।

पहिलो हाफको अन्तिम मिनेटमा भिनिसियस जुनिअरले गोल गरे । उनले मार्को एसेन्सियोको क्रसलाई हेडरमार्फत गोल गरेका थिए । तर ८१ औं मिनेटमा टिमो वेर्नरले काउन्टर अट्याकमा गोल गर्दै पुन: घरेलु टोलीलाई २ गोलले अघि बढाए । रोड्रीगोले इन्ज्युरी समयमा पेनाल्टीमा गोल गरेपनि खेलको नतिजा बदल्न सकेनन् ।

यस समूहको अर्को खेलमा सेल्टिक र शाख्तर डोनेस्कले १-१ को बराबरी खेले । सेल्टिकले पहिलो हाफमा जिर्जस जिआकौमाकिसको गोलमा अग्रता लिएको थियो । दोस्रो हाफमा मुखालो मुद्रिकले उत्कृष्ट एकल गोल गर्दै खेल बराबरी गरे ।

अंक तालिकामा रियल ५ खेलमा १० अंक जोड्दै शीर्षस्थानमा छ । लाइप्जिगको ५ खेलमा ९ अंक र शाख्तरको ५ खेलमा ६ अंक छ । सेल्टिक २ अंक जोड्दै समूह चरणबाट बाहिरिसकेको छ ।