एजेन्सी – ह्यारी केनले इन्ज्युरी समयको अन्तिम मिनेटमा गरेको विजयी गोलले भीएआरबाट मान्यता नपाउँदा टोटेनहम हट्सपर युरोपेली च्याम्पियन्स लिग अन्तर्गत समूह डी को खेलमा स्पोर्टिङ लिस्बनसँग २-२ को बराबरीमा रोकिएको छ ।

घरेलु मैदानमा टोटेनहमले पहिलो हाफ फितलो प्रदर्शन गरेपनि दोस्रो हाफमा सुधारेको थियो । टोटेनहमकै पूर्व खेलाडी मार्कस एड्वार्ड्सले २२ औं मिनेटमा पाहुना टोलीलाई अग्रता दिलाएका थिए । उनले एकल प्रयासमा सुन्दर गोल गर्दै घरेलु समर्थकलाई स्तब्ध पारे ।

तर दोस्रो हाफको ८० औं मिनेटमा रोड्रीगो बेन्टानकुरले गोल गरे । उनले इभान पेरिसिचको क्रसलाई हेडरमार्फत गोलमा परिणत गर्दै खेल बराबरीमा ल्याए । इन्ज्युरी समयमा केनले गोल गरेपनि रेफ्रीले भीएआरको सहायता लिँदै त्यसलाई मान्यता दिएनन् । गोलअघि मुभमा अफसाइड भएको भनेपनि उक्त निर्णय प्रष्ट नहुँदा निकै विवाद भएको थियो ।

त्यस्तै अर्को खेलमा फ्रान्कफर्टले घरेलु मैदानमा मार्सेलाई २-१ ले पराजित गर्यो । यस नतिजाले समूहको अघि बढ्ने समिकरण एकदम खुला बनाएको छ ।

टोटेनहम ५ खेलमा ८ अंकसहित शीर्ष स्थानमा छ । लिस्बन र फ्रान्कफर्टको समान ७-७ अंक छ भने मार्सेको ५ खेलमा ६ अंक छ । सबै टोलीको शीर्ष स्थानमा पुग्ने सम्भावना रहेको यस समूहमा अब अन्तिम खेलको नतिजाले नकआउट चरण पुग्ने टोलीको छिनोफानो हुनेछ ।