एजेन्सी – खेल सकिएपछि भिडियो असिस्टेन्ट रेफ्री (भीएआर) ले दिएको पेनाल्टीमा यान्निक कारास्कोले गोल गर्न नसक्दा स्पेनिस क्लब एट्लेटिको मड्रिड च्याम्पियन्स लिगमा जितबाट वञ्चित हुँदै युइएफए च्याम्पियन्स लिगको समूह चरणबाटै बाहिरिएको छ ।

जित निकाल्दै समूह चरण पार गर्ने सम्भावना कायम राख्न डटेको एटलेटिको बायर लिभरकुसनसँग २–२ गोलको बराबरीमा रोकिएपछि समूह चरणबाटै बाहिरिन पुग्यो । लिभरकुसनलाई हराउन सकेको भए एट्लेटिकोले शीर्षस्थानमा रहेको क्लब ब्रुगसँग ३ र एफसी पोर्टोसँग २ अंकको अन्तर राख्दै अन्तिम खेलबाट समूह चरण पार गर्ने छिनो फानो लाग्ने थियो । तर, बराबरीमा रोकिएसँगै एट्लेटिको समूह चरणबाटै बाहिरिन बाध्य बन्यो ।

अब एट्लेटिकोले अन्तिम खेलमा जित निकालेपनि अघिल्लो चरण पुग्न पर्याप्त हुनेछैन । एट्लेटिकोले अन्तिम खेलमा पोर्टाेसँग १ नोभेम्वरमा खेल्दैछ ।

वान्डा मेट्रोपोलिटानोमा बुधबार राति भएको खेलको नवौं मिनेटमा मोउसा डियावीको गोलबाट बायर लिभरकुसनले अग्रता लिएको थियो । २२औं मिनेटमा यान्निक कारास्कोले गोल गर्दै खेललाई १–१ गोलको बराबरीमा ल्याए । २९औं मिनेटमा कलुम हड्सन ओडोइले गोल गर्दै लिभरकुसनलाई पुनः २–१ को अग्रता दिलाए । ५०औं मिनेटमा रोड्रिगो डि पउलले गोल गर्दै खेललाई २–२ गोलको बराबरीमा ल्याए ।

खेलको इन्ज्युरी समयको अन्तिम मिनेटमा एटलेटिकोले कर्नर पाएको थियो । उक्त कर्नरमा गोल हुन सकेन र रेफ्रीले खेल सकिएको सिठी फुके । तर कर्नरका दौरान भएको ह्यान्ड बललाई भीएआरमा हेर्दै रेफ्रीले पेनाल्टी प्रहारको निर्णय दिएपछि निकैबेर विवाद भएको थियो ।

एटलेटिकोका लागि करास्कोले गरेको पेनाल्टी प्रहार ह्रादेच्कीले बचाए । उक्त बचाउबाट आएको रिबाउन्डमा साउल निगुएजको हेडरले क्रसबारमा लागेको थियो । त्यसमा आएको रिबाउन्डमा रेइनिल्दोको प्रहार आफ्नै खेलाडीलाई लाग्दै बाहिरियो ।

यही समूह ‘बी’ को अर्काे खेलमा शीर्ष स्थानमा रहेको क्लब ब्रुगलाई एफसी पोर्टाेले ४–० ले पराजित गर्दै नकआउट चरणमा छनोट हुन सफल भएको छ । पोर्टाेको जितमा मेधी तारेमीले दुई तथा इभानिल्सन र स्टेफनले समान एक गोल गरे ।

यस नतिजासँगै पोर्टाेले ५ खेलबाट ९ अंक जोड्दै अर्को चरणको यात्रा पक्का गर्यो । पराजित क्लब ब्रुग १० अंक जोडेर शीर्षमा यथावत रहेको छ । एट्लेटिको ५ खेलबाट ५ अंक जोडेर तेस्रो स्थानमा छ भने लिभरकुसन ४ अंक जोडेर पुछारमा छ ।