मोरङ (हाम्रो खेलकुद) – राष्ट्रिय फुटबल टोलीका खेलाडीले भरिपूर्ण झापाको रोलिङ क्लबले पाँचौ बेलबारी गोल्डकपमा जित हासिल गर्दै क्वाटरफाइनलमा स्थान बनाएको छ ।

राष्ट्रिय टोलीको समेत कप्तान रहिसकेका सुजल श्रेष्ठको नेतृत्वमा रहेको रोलिङले ए डिभिजनकै खेलाडीले भरिएको पेमा युथ क्लबलाई १-० ले हराएको हो । निकै प्रतिस्पर्धात्मक खेलमा रोलिङका रेजिन सुब्बाले गरेको गोल नै निर्णायक सावित भयो । उनले खेलको ५० औं मिनेटमा गोल गरेका थिए ।

त्यसअघि पहिलो हाफमा पेमाले पटक पटक पाएको अवसर सदुपयोग गर्न नसक्दा अग्रता लिन चुकेको थियो । राष्ट्रिय टोलीका गोलरक्षक दीप कार्कीले रवी पासवान, सुदील राई र निरकुमार राईको प्रहार विफल पार्दै रोलिङलाई खेलमा कायम राखे । दीप खेलको प्लेयर अफ द म्याच समेत बने ।

रोलिङबाट राष्ट्रिय टोलीका सुजल र दीपसँगै अनन्त तामाङ, देवेन्द्र तामाङ, पुजन उपरकोटी, तेज तामाङ, संजोक राई, निशान खड्का र दीनेश राजवंशी खेलेका थिए । यस्तै उमेर समूहका रेजिन र जीवन गुरुङ पनि टोलीमा थिए । पेमाको कप्तानी अशोक खवासले सम्हालेका थिए भने राष्ट्रिय स्तरका थुप्रै खेलाडी टोलीमा थिए ।

रोलिङले विहीबार आयोजक बेलबारी-११ को सामना गर्नेछ । बुधबार प्रतियोगिता अन्तर्गत भारतको एमएमएफसी र सिरहाको सलहेश युवा क्लबबीच खेल हुनेछ ।