एजेन्सी – परिवर्तित खेलाडीको रुपमा मैदान छिरेका उरुग्वेली फरवार्ड डार्विन नुनेजले एक गोलसँगै अर्काे गोलको लागि असिस्ट प्रदान गरेपछि इंग्लिस क्लब लिभरपुलले युइएफए च्याम्पियन्स लिगमा इटालियन क्लब नेपोलीलाई पराजित गरेको छ ।

लिभरपुलले घरेलु मैदानमा नेपोलीलाई २–० ले पराजित गरेको हो । एक गोल मोहम्मद सलाहले गरे । लिभरपुलको दुवै गोल दोस्रो हाफको अन्त्यतिर भएको थियो ।

एनफिल्डमा मंगलबार राति रोमाञ्चक र प्रतिस्पर्धात्मक बनेको खेलको ५३औं मिनिेटमा नेपोलीले गोल गरेपनि गोलले भिएआरबाट मान्यता नपाउँदा नेपोली अग्रता लिनबाट चुक्यो । लियो ओस्टिगार्डले गोल गरेपनि उक्त गोलमा मुभमा भिएआरले अफसाइड देखाएको थियो ।

८५औं मिनेटमा सलाहले गोल गर्दै लिभरपुललाई १–० को अग्रता दिलाए । उनले नुनेजको पासमा गोल गर्न सफल भएका थिए । त्यसपछि इन्ज्युरी समयको थप गरिएको अन्तिम समयमा नुनेजले गोल गर्दै लिभरपुललाई सहज जित दिलाए । ७३औं मिनेटमा कर्टिस जोनको स्थानमा मैदान छिरेका नुनेजले क्लोज रेन्जबाट फिनिस गरे ।

यस जितसँगै लिभरपुलले नेपोलीसँग अंक बराबरी गरेपनि गोल अन्तरमा पछि पर्दै लिभरपुल समुह ‘ए’ मा दोस्रो भएको छ । राम्रो गोलको आधारमा पराजित नेपोली समूहमा शीर्षस्थानमा रहँदै प्रि–क्वाटरफाइनलमा प्रवेश गरेको छ । नेपोली र लिभरपुलले समान ६ खेलबाट १५ अंक जोड्यो ।

यही समूहको अर्काे खेलमा आयाक्सले रेन्जर्सलाई ३–१ ले पराजित गरेको छ । यस जितसँगै आयाक्सले ६ खेलबाट ६ अंक जोड्यो । रेन्जर्सले अंकको खाता खोल्न सकेन ।