एजेन्सी – एक खेल बाँकी छँदै च्याम्पियन्स लिगको नकआउट चरणमा स्थान पक्का गरिसकेको इंग्लिस क्लब चेल्सी र इटालियन क्लब एसी मिलानले समूह चरणको अन्तिम खेलमा सफलता हात पारेका छन् ।

चेल्सीले घरेलु मैदानमा क्रोएसियन क्लब डिनामो जाग्रिवमाथि २–१ को पूनरागमन जित निकालेको छ । चेल्सीको जितमा रहिम स्टर्लिङ र डेनिस जाकारियाले गोल गर्दा डिनामोका ब्रुनो पेटकोभिकको गोल सान्त्वना बन्यो ।

स्टामफोर्ड ब्रिजमा बुधबार राति भएको खेलको सातौं मिनेटमा ब्रुनोको गोलबाट चेल्सी खेलमा पछि पर्यो । १८औं मिनेटमा रहिम स्टर्लिङले गोल गर्दै खेललाई १–१ गोलको बराबरीमा ल्याए ।

३०औं मिनेटमा डेनिस जाकारियाले गोल गर्दै चेल्सीलाई पहिलो हाफमा २–१ ले अघि बढाए । दोस्रो हाफमा थप गोल निस्कन नसक्दा पहिलो हाफको नतिजा नै चेल्सीको जितमा पर्याप्त बन्यो ।

अर्काे खेलमा मिलानले अष्ट्रियन क्लब साल्जवर्गलाई ४–० ले पराजित गरेको छ । मिलानको जितमा ओलिभर जिरुउडले दुई तथा रेड क्रुनिक र जुनियर मेसिएसले समान एक गोल गरे ।

मिलानोमा बुधबार राति भएको खेलको १४औं मिनेटमा जिरुउडको गोलबाट मिलानले अग्रता लिएको थियो । ४६औं मिनेटमा रेडले गोल गर्दै मिलानको अग्रता दोब्बर पारे ।

५७औं मिनेटमा जिरुउडले व्यक्तिगत दोस्रो तथा टोलीका लागि तेस्रो गोल गर्दै मिलानलाई खेलमा ३–० ले अघि बढाए । त्यसपछि इन्ज्युरी समयको थप गरिएको पहिलो मिनेटमा जिरुउडको पासमा जुनियर मेसिएसले गोल गर्दै मिलानलाई फराकिलो जित दिलाए ।

यस नतिजासँगै समूह ‘ईं’ मा चेल्सी १३ अंक जोडेर शीर्षस्थानमा रह्यो । दोस्रो स्थानमा रहेको मिलानले १० अंक जोड्दा साल्जवर्गले ६ तथा डिनामोले ४ अंक जोड्यो ।