काठमाडौं (हाम्रो खेलकुद) – बंगलादेशमा जारी साफ यू१५ महिला च्याम्पियनसिपमा आज (शनिबार) नेपालले घरेलु टोली बंगलादेशसँग प्रतिस्पर्धा गर्दैछ ।

नेपाल र बंगलादेशबीचको खेल ढाकाको बीएसएसएसएमके स्टेडियममा नेपाली समय अनुसार दिउँसो ४ः१५ बजेपछि सुरु हुनेछ । तीन राष्ट्रको मात्रै सहभागिता रहेको च्याम्पियनसिपमा नेपाल र बंगलादेश दुवै दोस्रो जित निकाल्ने लक्ष्यमा हुनेछ ।

दुवै बंगलादेशले तुलनात्मक रुपमा कमजोर प्रतिद्धन्द्धी भुटानमाथि ८–० को फराकिलो जित निकाल्दा नेपालले पनि ७–० को जित निकाल्न सफल भएको थियो । यस्तोमा दुवै टोली दोस्रो जित निकाल्दै उपाधि यात्रालाई थप मजवुत बनाउन चहान्छ ।

भुटानमाथि ७–० को जित निकाल्दा नेपाली वर्षा ओलीले ह्याट्रिक सहित चार गोल गर्दा सुक्रिया मियाले दुई गोल गरेकी थिइन् । उनीहरु नै बंगलादेशविरुद्ध हतियार हुनेछिन् ।

लिग चरणमा नेपाल र बंगलादेशले समान एक खेल खेल्दा बंगलादेश र नेपालले समान ३ अंक जोडेको छ । गोल अन्तरमा बंगलादेश शीर्षस्थानमा छ । भुटानले दुई खेल खेल्दा जित निकाल्न सकेको छैन ।

बंगलादेशसँगको खेलपछि नेपालले ९ नोभेम्वरमा भुटान र त्यसपछि ११ नोभेम्वरमा बंगलादेशसँग खेल्नेछ । लिग चरणको समाप्तिपछि धेरै अंक जोड्ने टोली च्याम्पियन बन्ने छ ।