काठमाडौं (हाम्रो खेलकुद) – अखिल नेपाल फुटबल संघ (एन्फा) ले यसै महिना घरेलु मैदानमा हुने पाकिस्तानसँगको अन्तर्राष्ट्रिय मैत्रीपूर्ण फुटबलको लागि नरेश थापालाई सहायक प्रशिक्षकमा नियुक्त गरेको छ ।

एन्फाले मंगलबार मैत्रीपूर्ण खेलका लागि थापालाई सहायक प्रशिक्षकको जिम्मेवारी दिईएको जनाएको छ । एन्फाका अध्यक्ष पंकज विक्रम नेम्वाङले थापालाई नियुक्ति पत्र हस्तान्तरण गरेका थिए । नरेश ‘ए’ डिभिजन टोली जावलाखेल युथ क्लबका पुर्व खेलाडी तथा प्रशिक्षक हुन् ।

यसअघि एन्फाले लिग च्याम्पियन मच्छिन्द्र फुटबल क्लबका प्रशिक्षक प्रवेश कटुवाललाई मुख्य प्रशिक्षक नियुक्त गरिसकेको छ । टोलीले गत सातादेखि प्रशिक्षण सुरु गरिसकेको छ । प्रारम्भिक चरणमा ३० खेलाडी प्रशिक्षणमा सामेल छन् ।

विश्व फुटबलको सर्वाेच्च निकाय (फिफा) को निलम्बन फुकुवासँगै पाकिस्तान आठ वर्षपछि अन्तर्राष्ट्रिय फुटबलमा फर्कदै छ । निलम्बन फुकुवापछि पाकिस्तानको सिनियर पुरुष टोलीले नेपालविरुद्ध पहिलो अन्तराष्ट्रिय खेल खेल्न लागेको हो । नेपाल र पाकिस्तानबीचको खेल कार्तिक ३० गते त्रिपुरेश्वरस्थित दशरथ रंगशालामा साँझ ५ बजे हुने छ ।

प्रशिक्षक अब्दुल्लाह अलमुताइरीले राजीनामा दिएपछि नेपाल प्रशिक्षक विहीन रहेको छ । गत असोजमा नेपालले बंगलादेशसँग मैत्रीपूर्ण खेल खेल्दा प्रदीप हुमागाईंलाई कार्यवहाक मुख्य प्रशिक्षकको जिम्मेवारी प्रदान गरेको थियो । उक्त खेलमा अन्जन विष्टको ह्याट्रिकमा ३–१ को जित निकालेको थियो ।