काठमाडौं (हाम्रो खेलकुद) – बंगलादेशमा जारी साफ यू१५ महिला च्याम्पियनसिपमा आज (बुधबार) अपराजित रहेको नेपालले भुटानसँग प्रतिस्पर्धा गर्दैछ ।

नेपाल र भुटानबीचको खेल ढाकाको बीएसएसएसएमके स्टेडियममा नेपाली समय अनुसार दिउँसो ४ः१५ बजेपछि सुरु हुनेछ । भुटानविरुद्ध मैदान उत्रदा नेपाल लगातार तेस्रो जित निकाल्दै उपाधि यात्रालाई थप मजवुत बनाउन चहान्छ ।

नेपालले यसअघि पहिलो खेलमा भुटानलाई ७–० ले तथा घरेलु टोली बंगलादेशलाई १–० ले हराएर ६ अंक जोडेको छ । भुटानलाई पनि हराएर नेपाल अपराजित रहने योजनामा हुनेछ । भुटानविरुद्ध ह्याट्रिक सहित चार गोल र बंगलादेशविरुद्ध पनि निर्णायक गोल गरेकी वर्षा ओली टोलीको मुख्य हतियार हुनेछिन् ।

तीन खेलमा नै पराजय भोगेको भुटान च्याम्पियनसिपबाट बाहिरिसकेको छ । भुटानले नेपालसाग ७–० को हार बेहोर्दा बंगलादेशसँग ८–० र ९–० को हार भोगेर अंकविहीन छ ।

हालसम्म बंगलादेश ३ खेलबाट ६ अंक जोडेर शीर्षस्थानमा रहेको छ । एक खेल कम खेलेको नेपालको ६ अंक नै रहेपनि गोल अन्तरमा पछि छ । भुटानको गोल र अंकको खाता खोल्न सकेको छैन ।

३ राष्ट्र सहभागी यस प्रतियोगिता डबल राउन्ड रोबिन पद्दतिमा भइरहेको छ । लिगको अन्त्यमा सर्वाधिक अंक जोड्ने टोलीले प्रतियोगिता जित्नेछ । नेपालले भुटानलाई पराजित गरेर शुक्रबार बंगलादेशसँग बराबरी खेलेमा उपाधि जित्नेछ । नेपालले ११ नोभेम्वरमा बंगलादेशसँग अन्तिम खेल खेल्नेछ ।