काठमाडौं (हाम्रो खेलकुद)– नेपाल र पाकिस्तानको राष्ट्रिय फुटबल टोलीबीच अर्को साता हुने मैत्रीपूर्ण खेल दशरथ रंगशाला पुगेर हेर्नका लागि दर्शकले १ हजार वा ५ सय रुपैयाँको टिकट किन्नु पर्नेछ ।

नेपाल र पाकिस्तानबीच मंगलबार साँझ ५ बजे सुरु हुने खेलका लागि अखिल नेपाल फुटबल संघ (एन्फा) ले भिआइपीतर्फ १ हजार र साधारण प्यारापिटतर्फ ५ सय रुपैयाँ दरको टिकट शुल्क निर्धारण गरेको बिहीबार पत्रकार सम्मेलनमार्फत जानकारी दिएको छ ।

एन्फाले यसअघि नेपाल र बंगलादेशबीच असोज ११ गते भएको मैत्रीपूर्ण खेलमा जस्तै ८० वटा भिभिआइपी टिकटको मुल्य ५ हजार रुपैयाँ तोकेको छ । टिकट खरिद गर्नेमध्ये एक भाग्यशाली विजेताले ब्राजिल र क्यारुनबीचको विश्व कप खेल हेर्न पाउने एन्फाले जनाएको छ । टिकट विक्रीका लागि फुटसल भिलेज प्रालिलाई जिम्मेवारी दिएको एन्फा प्रवक्ता सुरेश शाहले जानकारी दिए ।

नेपाल र पाकिस्तानबीचको खेलका लागि झण्डै ४९ लाख रुपैयाँ खर्च हुने एन्फाले अनुमान गरेको छ । अन्तराष्ट्रिय मैत्रीपुर्ण खेलको मार्केटिङ्ग, बोर्डकास्टिङ्ग र डिजिटल अधिकारको विक्रि सम्बन्धमा टेन्डर आह्वान गरिएको पनि प्रवक्ता शाहले जानकारी दिए ।

दशरथ रंगशलामा असोज ११ गते भएको मैत्रीपूर्ण खेलमा नेपालले बंगलादेशलाई ३–१ ले हराएको थियो । खेलमा अन्जन विष्टले ह्याट्रिक गरेका थिए । यसपटक सहिद स्मारक ए डिभिजन लिगको च्याम्पियन मछिन्द्र क्लबका प्रशिक्षक प्रवेश कटुवाललाई एन्फाले पाकिस्तानविरुद्धको खेलको प्रशिक्षण गर्ने जिम्मेवारी दिएको छ । कटुवालले ३० खेलाडी समेटेर प्रशिक्षण सञ्चालन गरिरहेका छन् ।