काठमाडौं (हाम्रो खेलकुद)– राष्ट्रिय फुटबल टोलीका पूर्व तीन कप्तानसम्मिलित सिएमजी क्लब संकटा नेपाल भारतको नयाँ दिल्लीमा आयोजना हुने थ्री नेसन्स भेट्रान्स कप फुटबल प्रतियोगितामा भाग लिन बिहीबार त्यसतर्फ प्रस्थान गरेको छ ।

राष्ट्रिय फुटबल टोलीका पूर्व कप्तानत्रय उपेन्द्रमान सिंह, बालगोपाल महर्जन, राकेश श्रेष्ठसहित टोलीमा अधिकांश पूर्व राष्ट्रिय खेलाडी रहेका छन् । राष्ट्रिय टोलीका फरवार्ड जुमानु राई, मिडफिल्डर प्रदीप महर्जन, राजु तामाङ, गोलकिपर सुरेन्द्र श्रेष्ठ, डिफेन्डर चुन थापालगायतका छन् ।

टोलीका अन्य खेलाडीमा राजकुमार केसी, कल्याण खड्गी, विजय जायाकु श्रेष्ठ, रमेश गुरुङ, सन्तोष बस्नेत, विष्णुबहादुर सुनार, राजन महर्जन, रञ्जित लामा रहेका छन् । आशिषमान सिंह व्यवस्थापक रहेको टोलीको प्रशिक्षकमा राजेश मानन्धर, फिजियो राजु दाहाल र अफिसियलमा सुदन बज्राचार्य छन् ।

शुक्रबार हुने प्रतियोगितामा संकटाले पहिलो खेल दिल्ली सन्डे क्लब भारतसँग खेल्नेछ । दोस्रो खेल भेट्रान्स फुटबल क्लब बंगलादेश र दिल्लीबीच हुनेछ । अन्तिम खेल संकटा र बंगलादेशको टोलीबीच हुने संकटाले जनाएको छ । संकटाका पदाधिकारीले बुधबार टोलीलाई बिदाई गरेको थियो ।