एजेन्सी – खेलमा दुईपटक पछि परेको स्थिति उल्ट्याएर प्रिमियर लिग प्रतिद्धन्द्धी एस्टन भिल्लामाथि पूनरागमन जित निकाल्दै म्यानचेस्टर युनाइटेड इएफएल कप (कारवाओ) कपको चौथो चरणमा प्रवेश गरेको छ ।

युनाइटेडले घरेलु मैदानमा भिल्लालाई ४–२ ले पराजित गरेको हो । युनाइटेडको जितमा एन्थोनी मार्सियाल, मार्कुस रासफोर्ड, ब्रुनो फर्नान्डेस र स्कट म्याकटोमिनेले गोल गरे । भिल्लाका ओले वाट्किन्सले गोल गर्दा एक गोल उपहार पाएको थियो ।

ओल्ड ट्राफोर्डमा बिहीबार राति भएको प्रतिस्पर्धात्मक खेलको ४८औं मिनेटमा ओले वाट्किन्सको गोलबाट युनाइटेड पछि परेको थियो । उनले ज्याकोव राम्सेको पासमा गोल गरेका थिए । ४९औं मिनेटमा एन्थोनी मार्सियालले ब्रुनो फर्नान्डेसको पासमा गोल गर्दै खेललाई १–१ गोलको बराबरीमा ल्याए ।

६१औं मिनेटमा डिएगो डालोटले आत्मघाती गोल गरेपछि युनाइटेड खेलमा पुनः २–१ ले पछि पर्यो । ६७औं मिनेटमा मार्कुस रासफोर्डले गोल गर्दै खेललाई २–२ गोलको बराबरीमा ल्याउँदै युनाइटेडलाई खेलमा फर्काए ।

७८औं मिनेटमा ब्रुनो फर्नान्डेसले एलेजान्द्रो गारनाचोको पासमा गोल गर्दै युनाइटेडलाई ३–२ को अग्रता दिलाए । त्यसपछि इन्ज्युरी समयको थप गरिएको पहिलो मिनेटमा स्कट म्याकटोमिनेले गोल गर्दै युनाइटेडलाई ४–२ को पूनरागमन जित दिलाए ।