एजेन्सी – लन्डन क्लब चेल्सीले इंग्लिस प्रिमियर लिगमा अर्काे हार बेहोर्दा टोटेनहम हटस्परले रोमामाञ्चक जित निकालेको छ । चेल्सी न्यूक्यासल युनाइटेडसँग १–० ले पराजित भएको हो ।

चेल्सीले एस्टन भिल्लालाई २–० ले पराजित गरेयता प्रिमियर लिगमा जित निकाल्न सकेको छैन । पछिल्लो पाँच खेलमा चेल्सीले लगातार तेस्रो हार बेहोरेको हो । प्रिमियर लिगमा चेल्सीकाे लगातार तेस्राे हार हाे ।

यसअघि चेल्सी प्रिमियर लिगमा ब्राइटनसँग ४–१, आर्सनलसँग १–० ले तथा कारवाओ कपमा म्यानचेस्टर सिटीसँग २–० ले पराजित भएको थियो ।

सेन्ट जेम्स पार्क न्यूक्यासलमा शनिबार राति भएको खेलमा घरेलु टोलीको जितमा दोस्रो हाफमा जोसेफ विललकले गरेको गोल नै निर्णायक बन्यो । उनले ६७औं मिनेटमा मिगुइल अल्मिरोनको पासमा गोल गर्न सफल भएका थिए ।

यस जितसँगै न्यूक्यासल १५ खेलबाट ३० अंक जोडेर तेस्रो स्थानमा उक्लिएको छ । एक खेल कम खेलेको शीर्षस्थानको आर्सनलको ३७ तथा म्यानचेस्टर सिटीको ३२ अंक छ । पराजित चेल्सी १४ खेलबाट २१ अंक जोडेर आठौं स्थानमा रहेको छ ।

अर्काे खेलमा टोटेनहमले खेलमा दुईपटक पछि परेको स्थिति उल्ट्याएर लिड्स युनाइटेडमाथि ४–३ को रोमाञ्चक जित निकालेको छ ।

घरेलु मैदानमा टोटेनहमको जितमा रोड्रिगो बेन्टनकरले दुई तथा ह्यारी केन र बेन डेभिसले समान एक गोल गरे । लिड्सका रोड्रिगोले दुई तथा क्राइसेन्सियो समरभिलीले एक गोल गरे ।

यस जितसँगै टोटेनहम १५ खेलबाट २९ अंक जोडेर चौथो स्थानमा रहेको छ । लिड्स १५ अंक जोडेर १५औं स्थानमा छ ।