काठमाडौं (हाम्रो खेलकुद)– सहिद स्मारक ए डिभजिन लिगको सर्वाधिक सफल टोली मनाङ मस्र्याङ्दी क्लबले किट प्रायोजकको रुपमा नेपाली ब्राण्ड केटिएम सिटीसँग प्रायोजन सम्झौता नविकरण गरेको छ ।

झण्डै दुई महिनापछि सुरु हुने ए डिभिजन लिग खेल्ने तयारीमा रहेको मनाङले शेर्पा आउटडोरको केटिएम सिटीसँग दुई वर्षका लागि सम्झौता नविकरण गरेको हो । मनाङका महासचिव तेन्जिङ गुरुङ र केटिएम सिटीका सिईओ निमा नोर्बु शेर्पाले आइतबार सम्झौता पत्रमा हस्ताक्षर गरे ।

गत वर्ष पनि केटिएम सिटी मनाङको किट प्रायोजन गरेको थियो । यसपटकको सम्झौता अवधि २ वर्षको रहने बताइको छ । मनाङलाई आवश्यक पर्ने सम्पूर्ण किट सामाग्री केटिएम सिटीले उपलब्ध गराउने बताइएको छ । मनाङले भाग लिने सबै राष्ट्रिय तथा अन्तराष्ट्रिय फुटबल प्रतियोगितामा केटिएम सिटीको किट प्रयोग गर्नेछ ।

नेपाली फुटबलको सर्वाधिक सफल क्लबको रुपमा रहेको मनाङले घरेलु फुटबलका लागि तयारी सुरु गरिसकेको मनाङका तेन्जिङ गुरुङले विज्ञप्तीमार्फत जनाएका छन् । मनाङले सर्वाधिक ८ पटक सहिद स्मारक ए डिभिजन लिगको उपाधि जितेको छ । यसपटक लिग पुस २६ गते सुरु हुने अखिल नेपाल फुटबल संघ (एन्फा) ले घोषणा गरिसकेको छ ।