एजेन्सी – यसपल्टको विश्वकपमा छनोट हुन असफल भएको इटालीले अन्तर्राष्ट्रिय मैत्रीपूर्ण खेलमा पूनरागमन जित निकालेको छ ।

इटालीले अल्वानियामाथि ३–१ को पूनरागमन जित निकालेको हो । इटालीको जितमा भिन्सेन्जो ग्रिफोले दुई तथा जियोभानी डि लोरेन्जोले एक गोल फर्काए । अल्वानियाका एड्रियन इस्माजिलीको गोल सान्त्वना बन्यो ।

अल्वानियामा बुधबार राति भएको खेलको १६औं मिनेटमा इटाली पछि परेको थियो । एड्रियन इस्माजिलीले निडिम वजरामीको पासमा गोल गर्न सफल भएका थिए ।

अल्वानियाको त्यो अग्रता लामो समय टिकेन । २०औं मिनेटमा जियोभानी डि लोरेन्जोले गोल गर्दै खेललाई १–१ गोलको बराबरीमा ल्याए । उनले भिन्सेन्जो ग्रिफोको पासमा गोल गर्न सफल भएका थिए ।

२५औं मिनेटमा भिन्सेन्जो ग्रिफोले नियाकोमो रास्पडोरीको पासमा गोल गर्दै इटालीलाई २–१ को अग्रता दिलाए । त्यसपछि ६४औं मिनेटमा भिन्सेन्जो ग्रिफोले व्यक्तिगत दोस्रो तथा टोलीका लागि तेस्रो गोल गर्दै इटालीको जित पक्का गराए ।

यस्तै विश्वकप अघिको अन्तिम अभ्यास खेलमा स्वीडेनले मेक्सिकोलाई २–१ ले पराजित गरेको छ । स्वीडेनको जितमा मार्कुस रोडेन र म्याटिएस भानवर्गले गोल गरे । मेक्सिकोका अर्नेस्टो भेगाले एक गोल फर्काए ।

विश्वकपमा मेक्सिको समूह ‘सी’ मा रहेको छ । मेक्सिकोले पोल्यान्ड, अर्जेन्टिना र साउदी अरेबियासँग खेल्नेछ । स्वीडेन भने विश्वकपमा छनोट हुन नसकेको टोली हो ।