इजिप्टसँग बेल्जियमको हार

एजेन्सी – फिफा विश्वकप कतार २०२२ को तयारीस्वरुप खेलिएको अन्तर्राष्ट्रिय मैत्रीपूर्ण खेलमा बेल्जियमले इजिप्टसँग हार बेहोरेको छ । बेल्जियम २–१ ले पराजित भएको हो ।

कुवेतमा शुक्रबार राति भएको खेलमा इजिप्टको जितमा मोस्तफा मोहमेद र ट्रेजग्वेटले गोल गरे । बेल्जियमका आइकोमा लुइस ओपेन्डाले एक गोल फर्काए ।

खेलको ३४औं मिनेटमा मोस्तफाको गोलबाट इजिप्टले पहिलो हाफमा १–० को अग्रता लिएको थियो । ४६औं मिनेटमा ट्रेजग्वेटले गोल गर्दै इजिप्टको अग्रता दोब्बर पारे । उनले मोहम्मद सलाहको पासमा गोल गर्न सफल भएका थिए ।

७६औं मिनेटमा परिवर्तिन खेलाडी ओपेन्डाले गोल गर्दै खेललाई २–१ को स्थितिमा ल्याए । मिचे बात्सुयाईको स्थानका ४६औं मिनेटमा मैदान ओपेन्डाले यान्निक कारास्कोको पासमा गोल गर्न सफल भएका थिए । त्यसपछि थप गोल निस्कन नसक्दा बेल्जियम पराजित हुन पुग्यो ।

विश्वकप अघिको यस हारले बेल्जियमलाई धक्का लागेको छ । समूह ‘एफ’ मा रहेको बेल्जियमले २३ नोभेम्वरमा क्यानडा, २७ नोभेम्वरमा मोरोक्को र १ डिसेम्वरमा क्रोएसियासँग खेल्ने तालिका छ । इजिप्ट भने विश्वकपमा छनोट हुन असफल राष्ट्र हो ।