धरान (हाम्रो खेलकुद)– विभागिय डर्बीमा नेपाल पुलिस क्लबलाई २–० ले हराउँदै एपिएफ सातौं राष्ट्रिय खेलकुदअन्तर्गत पुरुष फुटबलको फाइनलमा पुगेको छ । अर्को फाइनल पुग्ने टोलीको भने बिहीबारमात्र टुंगो लाग्ने भएको छ ।
नेपाली सेनाको आर्मी र मध्यमाञ्चलबिच टाइब्रेकर साँझ परेका कारण हुन नसकेपछि फाइनल पुग्ने टोलीको छिनोफानो बिहीबार बिहान मात्र हुने भएको छ । निर्धारित र थप समय दुवैतर्फ कुनै टिमबाट गोल हुन नसकेपछि खेल टाइब्रेकरमा धकेलिएको हो । अब बिहीबार दुई टोलीबीच पेनाल्टी सुटआउट हुनेछ । त्यसमा पराजित हुने टोलीले बिहीबार दिउँसो नै पुलिससँग तेस्रो स्थानका लागि प्रतिस्पर्धा गर्नेछ ।एपिएफले यसअघि नै महिला फुटबलको उपाधि जितिसकेको छ ।
महिलाको फाइनल एपिएफले पुलिसलाई नै हराएको थियो । फुटबलमा दोहोरो सफलता प्राप्त गर्नेतर्फ अघि बढेको एपिएफका जित दिलाउन धरानस्थित एन्फा टेक्निकल सेन्टरमा थप समयमा युवराज खड्काले र नविन लामाले गोल गरेका थिए । निर्धारित समय गोलरहित बराबरीमा टुंगिएको थियो । रामकुमारको पासमा युवराजले थप समयको १० औं मिनेटमा गोल गरेका थिए । थपसमय २९ औं मिनेटमा नविनले पनि रामकुमारकै पासमा गोल गरेका थिए ।
निर्धारित समयमा दुवै टोलीले गोलका केही मौका खेर फालेका थिए । फुटबल फाइनल सातौं राष्ट्रिय खेलकुदको समापनको दिन शुक्रबार हुनेछ ।
