एजेन्सी – इंग्लिस प्रिमियर लिग क्लब लिड्स युनाइटेडले इटालियन क्लब युभेन्ट्सका अमेरिकी मिडफिल्डर वेस्टन म्याकेनीलाई लोनमा अनुबन्धित गरेको छ ।
लिड्सले अमेरिकी मिडफिल्डर म्याकेनीलाई सिजनको अन्त्यसम्मको लागि लोनमा अनुबन्ध गरेको हो । २४ वर्षीया वेस्टनलाई लिड्सले जनवरी ट्रान्सफरको अन्तिम समयतिर क्लबमा आबद्ध गरेको हो । लिड्सले सिजनको अन्त्यपछि स्थायी खेलाडी बनाउन पाउने पनि सम्झौता छ ।
म्याकेनीले यो सिजन युभेन्ट्सका लागि २१ खेलमा ३ गोल गरेका छन् । जनवरी ट्रान्सफरमा म्याकेनी लिड्समा अनुबन्ध हुने तेस्रो खेलाडी हो । यसअघि लिड्सले म्याक्स वोबर र जर्जिनियो रुटरलाई अनुबन्ध गरिसकेको छ ।
म्याकेनीलाई अनुबन्ध गर्न प्रिमियर लिगका शीर्ष टोलीले पनि चासो देखाएका थिए । तर उनले लिड्स रोजेका हुन् । उनका अमेरिकी सहयात्री टेलर एडम्स र ब्रेन्डन आरोन्सनले प्रिमियर लिग खेल्छन् ।
अब म्याकेनीले नटिङहम फरेस्टसँग आगामी आइतवार प्रिमियर लिग खेलबाट लिड्सबाट डेब्यु गर्नेछन् । म्याकेनीले अमेरिकाबाट ४१ क्याप जित्दा ९ गोल गरेका छन् । कतार विश्वकप २०२२ मा अमेरिका प्रि–क्वाटरफाइनलमा पुग्दा उनले सबै चार खेलमा सुरुवात गरेका थिए ।
म्याकेनी सन् २०२० मा जर्मन क्लब साल्केबाट लोनमा जुभेन्ट्समा सामेल भएका थिए । त्यसको एक सिजनपछि उनी युभेन्ट्समा स्थायी खेलाडी बनेका थिए । उनले युभेन्ट्सबाट ६५ खेल खेल्दा ८ गोल गरेका छन् ।
