हेटौंडा (हाम्रो खेलकुद) – मनाङ मस्याङ्दी क्लब हेटौंडामा जारी पाँचौं संस्करणको सहिद स्मृति स्थानीय तह मकवापुर गोल्डकप फुटबल प्रतियोगिताको फाइनलमा प्रवेश गरेको छ ।

हेटौंडा–५ स्थित पिप्ले क्याम्पा रंगशालामा शनिबार भएको खेलमा एपिएफ फुटबल क्लबलाई टाइब्रेकरमा ४–२ ले पराजित गर्दै मनाङ उपाधि नजिक पुगेको हो । निर्धारित समय गोलरहित बराबरीमा टुंगिएपछि खेलको निर्णय पेनाल्टी सुटआउटबाट भएको थियो । मनाङले फाइनलमा हिमालयन शेर्पा र एभिनियर एफसी क्यामरुनबीचको विजेताको सामना गर्नेछ ।

मनाङलाइ अन्तिम दुईमा पु¥याउन टाइब्रेकरमा सरोज योञ्जन, विसन गुरुङ, सैजामोल हेडविनसन र आशिष गुरुङले गोल गरेका थिए । एपिएफका नवीन लामा र सुदिप सिख्रकारले मात्र गोल गरे । एपिएफका सनी श्रेष्ठको प्रहार गोलपोष्टको बारमा लागेर फर्किदा दीपेश धिमालको प्रहार मनाङका गोलरक्षक दीप कार्कीले रोके ।

मनाङका कप्तान समेत रहेका गोलकिपर दीप म्यान अफ दी म्याच घोषित भए र उनले १० हजार रुपैयाँ प्राप्त गरे । जिल्ला फुटबल संघ मकवानपुरले आयोजना गरेको प्रतियोगिताको दोस्रो सेमिफाइनल सोमबार हुनेछ । गोल्डकपको विजेताले १५ लाख र दोस्रो हुने टोलीले १० लाख रुपैयाँ प्राप्त गर्नेछ । प्रतियोगिताको सर्वोत्कृष्ट खेलाडीले बुलेट बाइक पाउनेछन् ।