काठमाडौं (हाम्रो खेलकुद) – नेपालभन्दा वरीयतामा कमजोर रहेपनि बुधबार सुरु हुने प्रधानमन्त्री भुटान र लाओसलाई कमजोर रुपमा नलिने नेपाली राष्ट्रिय फुटबल टोलीले बताएको छ ।

अखिल नेपाल फुटबल संघ (एन्फा) को आयोजनामा बुधबारदेखि त्रिपुरेश्वरस्थित दशरथ रंगशालामा प्रधानमन्त्री थ्री नेसन्स कप फुटबल सुरु हुँदैछ । थ्री नेसन्स कपमा घरेलु टोली नेपालसहित भुटान र लाओसको सहभागिता रहेको छ । थ्री नेसन्स कपको उद्घाटन खेलमा नेपाल र लाओस खेल्नेछन् । खेल साँझ ६ बजेपछि हुनेछ ।

नेपालले सन् २०१६ पछि पहिलोपटक लाओससँग खेल्न लागेको हो । एएफसी सोलिडारिटी कपको सेमिफाइनलमा नेपाल र लाओसबीच प्रतिस्पर्धा भएको थियो । जसमा २–२ गोलको बराबरीपछि नेपालले पेनाल्टीमा ३–० ले खेल जित्दा ट्राइब्रेकरमा किरण नायक बनेका थिए ।

नेपाली टोलीका कप्तान किरण चेम्जोङले छोटो तयारी भएपनि लाओसविरुद्ध खेल्न नेपाली टोली तयार रहेको बताएका छन् । ‘छोटो समय भएपनि तयारी राम्रो छ । लाओसविरुद्धको खेलको लागि तयार छौं । राष्ट्रका लागि राम्रो नतिजाका लागि फाइट गर्छौं,’ उनले भने ।

मंगलबार आयोजित प्रि–म्याच कन्फरेन्समा कप्तान किरणले भने, ‘नयाँ प्रशिक्षक र नयाँ खेलाडीको कारण टोलीका लागि चुनौती भएपनि त्यसलाई स्वीकार गरेर अघि बढ्नुको विकल्प छैन । तयारी छोटो भयो । नयाँ टिम छ । नयाँ प्रशिक्षक छन् । त्यसैले चुनौती छ । यसलाई स्वीकार गरेर अघि बढेका छौँ । सफल भइन्छ । हामीले एक अर्कालाई विश्वास गरेका छौँ । टिमका खेलाडी फिट छन् ।’

‘लाओस र भुटानसँग हामीले पहिला खेलेका छौं । म आफैं खेलेको थिएँ । तर लामो समय भइसकेको छ । टोलीमा परिवर्तन आएको छ । हामी आफ्नो उच्च प्रदर्शन गर्नेछौं । तर यो फुटबल हो, जस्तोसुकै नतिजा पनि आउन सक्छ,’ कप्तानले भने ।

मुख्य प्रशिक्षक अनेसेले थ्री नेसन्सका लागि आफुले उत्कृष्ट खेलाडी छनोट गरेको बताए । ‘तीन दिन तयारी गर्यौं । राम्रो तयारी भयो । हामीसँग धेरै युवा खेलाडी छन्,’ उनले भने, ‘लिगबाट हामीले उत्कृष्ट खेलाडी छनोट गरेका छौं । विपक्षी टिमको गुण आफुले देखेको र आफ्नो टिमको गुण समेत जानकारी छ । वरीयता हेरेर विपक्षी टोलीबारे थाहा हुँदैन ।’

लाओसका मुख्य प्रशिक्षक माइकल वेसले आफुसँग युवा टोली रहेको बताउँदै राम्रो नतिजाकै लागि खेल्ने बताए । लाओसका कप्तान सौकाफोन भोङ्चियाङखामले प्रतियोगिताका लागि पहिलोपटक नेपाल आउँदा खुशी लागेको बताउँदै प्रतियोगिताका लागि उत्साहित रहेको बताए । उनले घरेलु टोली नेपालविरुद्ध लाओसको फुटबल देखाउने बताए ।

भुटानका मुख्य प्रशिक्षक पेमाले थ्री नेसन्स कपका लागि २ महिनाबाट तयारी गरिएको र अन्य टोलीको जस्तो आफ्नो टोलीको लक्ष्य पनि जित नै रहेको बताए । भुटानी कप्तान चेन्चो ग्याल्सेनले प्रतियोगिताका लागि आफु उत्साहित रहेको बताए । उनले क्लब फुटबलमा आफ्नो सहकर्मी नेपाली टोलीका कप्तान तथा गोलरक्षक किरणविरुद्ध खेल्न कठिन हुने भएपनि आफु गोल गर्ने योजनामा रहेको बताए ।

सिंगल राउण्ड रोबिनको आधारमा हुने प्रतियोगिता शीर्ष दुई टोलीले उपाधिका लागि चैत १७ गते खेल्नेछन् । विजेताले ५ हजार अमेरिकी डलर, दोस्रोले ३ हजार डलर पाउने एन्फाले जनाएको छ । प्रतियोगिताको उत्कृष्ट खेलाडीले ५ सय अमेरिकी डलर र खेलको म्यान अफ दि म्याचले २ सय ५० डलर पाउने छन् । एन्फाले सामान्य प्यारापिटतर्फ ५ सय र भीभीआईपीतर्फ १ हजार टिकट दर राखिएको छ । प्रतियोगिताको प्रत्यक्ष प्रसारण एनटिभी प्लसबाट हुनेछ ।

यो पनि :

राष्ट्रिय टोलीमा ६ नयाँ खेलाडी

‘विमल घाइते, अन्जन फिट’