एजेन्सी – इटालियन सिरी ‘ए’ प्रतिद्धन्द्धी नेपोलीलाई पन्छाउँदै एसी मिलान १६ वर्षपछि युइएफए च्याम्पियन्स लिगको सेमिफाइनलमा प्रवेश गरेको छ ।

क्वाटरफाइनलको दोस्रो लेगमा १–१ गोलको बराबरी खेलेपनि समग्रमा २–१ को जित निकाल्दै मिलान १६ वर्षपछि अन्तिम चारमा पुग्न सफल भएको हो ।

सन् २००६–०७ को सिजनमा च्याम्पियन बनेयता मिलानले सात सिजन च्याम्पियन्स लिग खेलेपनि क्वाटरफाइनलभन्दा अघि बढ्न सकेको थिएन । मिलान पछिल्लोपटक २०११–१२ मा क्वाटरफाइनलमा पुगेको थियो ।

डिएगो अर्मान्डो म्याराडोना स्टेडियममा मंगलबार राति भएको खेलमा मिलानका ओलिभर जिरुडले गोल गर्दा घरेलु टोली नेपोलीका भिक्टर ओसिमहेनले बराबरी गोल फर्काएपनि अघिल्लो चरण पुग्न पर्याप्त भएन । नेपोली पहिलो लेगमा १–० ले पराजित भएको थियो ।

खेलको २२औं मिनेटमा ओलिभर जिरुडले पेनाल्टी चुकाउँदा मिलान अग्रता लिनबाट चुक्यो । पेनाल्टी चुकाएपनि जिरुडले ४३औं मिनेटमा राफयल लियोको पासमा गोल गर्दै मिलानलाई पहिलो हाफमा १–० को अग्रता दिलाए ।

८२औं मिनेटमा केभिचा कभरात्केलियाले पेनाल्टी चुकाउँदा नेपोली बराबरीबाट चुक्यो । इन्ज्युरी समयको थप गरिएको तेस्रो मिनेटमा भिक्टर ओसिमहेनले जियाकोमो रास्पाडोरीको पासमा गोल गर्दै खेललाई १–१ गोलको बराबरीमा ल्याएपनि पहिलो लेगमा पराजित भएका कारण क्वाटरफाइनलबाटै बाहिरिन पुग्यो ।

मिलानले अब सेमिफाइनलमा इन्टर मिलान वा बेन्फिकाबीचको विजेतासँग खेल्नेछ । पहिलो लेगमा इन्टर अघि छ ।क्वाटरफाइनलबाट बाहिरिएको नेपोली सिरी ‘ए’ को उपाधिनजिक छ । नेपोली शीर्षस्थानमा १४ अंकले अघि छ । मिलान चौथो स्थानमा छ ।