एजेन्सी – प्रिमियर लिग प्रतिद्धन्द्धी ब्राइटन होव अल्वियोनलाई सडनडेथमा पराजित गर्दै म्यानचेस्टर युनाइटेड एफए कपको फाइनलमा प्रवेश गरेको छ ।

आइतबार राति भएको खेलमा युनाइटेडले ब्राइटनलाई सडनडेथमा ७–६ ले पराजित गर्दै फाइनलमा म्यानचेस्टर सिटीसँगको भेट पक्का गरेको हो ।

वेम्वली स्टेडियम लन्डनमा निर्धारित र थप गरिएको समयमा कुनै गोल निस्कन नसकेपछि खेल टाइब्रेकरमा लम्बिएको थियो । टाइब्रेकरमा बराबरीबाट अघि बढ्दा ब्राइटनका सोली मार्चको प्रहार बाहिरिएपछि युनाइटेडले खेल आफ्नो पक्षमा पार्न सफल भयो ।

टाइब्रेकरमा युनाइटेडका सबै क्यासमिरो, डिएगो डालोट, जेडान सान्चो, मार्कस रासफर्ड, मार्सेल सवित्जर, वोउट वेगह्रस्ट र भिक्टर नेल्सन लिन्डेलफले गोल गरे । ब्राइटनका एलेक्सिस म्याक एलिस्टर, पास्कल ग्रस, डेनिज अन्डभ, पेर्भिस इस्टुपिनान, लेविस डन्क र एडम वेवस्टेरले गोल गर्न सफल भए ।

त्यसअघि ब्राइटनले युनाइटेडलाई दवावमा राखेपनि गोल गर्न नसक्दा खेल टाइब्रेकरमा भने युनाइटेडलाई नतिजा सुम्पन पुग्यो ।अब युनाइटेडले फाइनलमा म्यानचेस्टर डर्वीमा ३ जुनमा म्यानचेस्टर सिटीसँग प्रतिस्पर्धा गर्नेछ । सिटीले शनिबार राति च्याम्पियनसिप टोली सेफिल्ड युनाइटेडलाई ३–० ले पराजित गरी फाइनलमा पुगिसकेको छ ।