काठमाडौं (हाम्रो खेलकुद) – नेपाली राष्ट्रिय महिला टोलीका सरु लिम्बु र रेनुका नगरकोटे आबद्ध किकस्टार एफसी कर्नाटकाले भारतीय महिला लिग (आइडब्ल्यूएल) मा शुक्रबार विजयी भएको छ ।

सरुले गोल गरेको खेलमा किक स्टारले राष्ट्रिय टोलीकी अर्की सदस्य अनिता बस्नेत आबद्ध लर्डस एफए कोचीलाई ४–१ ले हराएको थियो । किओको एलेजावेथ काटुंग्वाले चौथो मिनेटमा गोल गर्दै अग्रता दिलाएको खेलमा किकस्टारका लागि २६ औं मिनेटमा लाइस्रम बिबिचा देवीले दोस्रो गोल गरेकी थिइन् । लर्डसका लागि काथलेन कामिलीले गोल गरेकी थिइन् ।

३९ औं मिनेटमा सरुको गोलबाट किक स्टारले गोलअन्तरलाई पुनः बढाएको थियो । ६६ औं मिनेटमा किकस्टारका लागि सोनिया मारकले गोल थपेकी थिइन् । सरुले पहिलो रोजाईमा खेलेकी थिइन् भने रेनुका दोस्रो हाफमा मैदान प्रवेश गरेकी थिइन् । लर्डस्मा अनिताले शुक्रबार खेल्ने मौका पाइनन् ।

चौथो खेलमा तेस्रो जितपछि ९ अंकका साथ किक स्टार समूह ‘बी’को तेस्रो स्थानमा छ । समान ९ अंकको उडिसा एफसी दोस्रो र १२ अंकका साथ नेपाली राष्ट्रिय टोलीकी कप्तान तथा गोलकिपर एन्जिला तुम्बापो सुब्बाको सेथु शीर्षस्थानमा छ । एन्जिलाको टोलीले शुक्रबार बिहान इस्टर्न स्पोर्टिङ युनियनलाई ३–० ले हराएको थियो ।

समूह ‘ए’मा १० अंकका साथ राष्ट्रिय टोलीकी फरवार्ड सावित्रा भण्डारी साम्बाको टोली गोकुलम केरेला एफसी शीर्ष स्थानमा छ । १६ टोलीको सहभागिता रहेको महिला लिगमा दुई समूह छ । दुबै समूहमा समान ८ टोलीले प्रतिस्पर्धा गरिरहेका छन् ।