काठमाडौं (हाम्रो खेलकुद)– अखिल नेपाल फुटबल संघ (एन्फा) का ३ सह महासचिव मध्ये वसन्त अर्यालले मासिक पारिश्रमिक नलिने घोषणा गरेका छन् । एन्फाको सोमबार बसेको आपकालिन बैठकले सह महासचिवलाई मासिक ७५ हजार रुपैयाँ दिने निर्णय गरेको थियो । यद्दपी त्यो निर्णयलाई भने एन्फाले सार्वजनिक गरेन ।

‘एन्फाले सह महासचिवलाई ७५ हजार रुपैयाँ पारिश्रमिक दिने निर्णय गरेछ । व्यक्तिगत रुपमा म त्यो पारिश्रमिक लिन्न’, विराटनगरमा रहेका अर्यालले मंगलबार भने, ‘यहाँ विराटनगरमा बस्छु र फुटबलमै सक्रिय छु । म काठमाडौं नियमित बस्दिन । फुटबलकै कामले काठमाडौं जाँदा पाउने सुविधा बाहेक म अरु सुविधा लिने छैन ।’

फुटबलबाट मासिक पारिश्रमिक नलिने आफ्नो व्यक्तिगत निर्णय रहेको जनाउँदै अर्यालले भने, ‘अरु सह महासचिव साथीहरुले पारिश्रमिक लिनुभएकोमा मेरो आपत्ती पनि छैन । काम गर्ने साथीहरुले लिनुपर्छ । तर, म लिन्न । विगतमा पनि साथीहरुले परिवारका सदस्य विरामी हुँदा उपचार खर्च लिएको पनि उदाहरण छ । मैले त्यति बेला त्यसरी कुनै खर्च लिएको छैन ।’

अर्यालसहित अरुणमान जोशी र दामोदर भट्टराई (बद्री) लाई फागुन १७ गते बसेको आपकालिन बैठकले उप महासचिव मनोनित गरेको थियो । त्यो बैठक तीन उपाध्यक्ष विराटजंग शाही, दीर्घबहादुर केसी (कुमार) , दीपक खतिवडासहित १० जनाले वहिष्कार गरेका थिए । त्यति बेलाको निर्णय आफूहरुलाई मान्ने नहुने बताउँदै आएकामध्ये अधिकांश उपाध्यक्ष र सदस्यहरु सोमबारको बैठकमा उपस्थित थिए ।

यसअघि सह महासचिवको पारिश्रमिक मासिक ५० हजार रुपैयाँ थियो । त्यति बेलाका सह महासचिवहरु मध्ये जोशीले मात्र पारिश्रमिक पाउँथे ।

सोमबारको बैठकमा पारिश्रमिक बढाउने एजेण्डामा अधिकांशको सहमति रहेको बैठकमा रहेका एक सदस्यले बताए । ‘अध्यक्षले तलब बढाउने विषयमा एजेन्डा प्रस्तुत गर्नुभयो’, उनले भने, ‘सामान्य छलफलपछि त्यो पास भएको थियो ।’

ए डिभिजन लिगमा मुख्य प्रायोजक समेत खोज्न नसकेको एन्फाले विभिन्न पदमा नियुक्त गर्दै आर्थिकभार थप्दै आएको छ ।