काठमाडौं (हाम्रो खेलकुद)– राष्ट्रिय फुटबल टोलीकी कप्तान एवंम् गोलकिपर एन्जिला तुम्बापो सुब्बा आबद्ध सेथु भारतीय महिला लिग (आइडब्ल्यूएल) को समूह ‘बी’को शीर्षस्थानमा रहँदै अघिल्लो चरणमा पुगेको छ ।

राष्ट्रिय टोलीकै दुई मिडफिल्डर सरु सुब्बा र रेनुका नगरकोटे आबद्ध किकस्टार्ट एफसी सोही समूहको दोस्रो स्थानमा रहँदै क्वार्टरफाइनल पुगेको छ । समूह चरणको अन्तिम खेलमा शनिबार सेथु उडिसा एफसीसँग गोलरहित बराबरीमा रोकिएको छ । एन्जिलाले पूरा समय मैदानमा बिताएकी थिइन् ।

त्यसअघि शनिबार बिहानको खेलमा सुरु र रेनुकाले पहिलो रोजाईमा खेलेको खेलमा किकस्टार्टले सेन्ट्रल रिजर्भ पुलिस फोर्स फुटबल क्लबलाई ९–० ले हराएको थियो । सरुले पहिलो हाफमै टोलीका लागि २ गोल गरेकी थिइन् । त्यसबाहेक टोलीका लागि लेइश्रम बिबिचा देवीले ह्याट्रिक गरेको खेलमा सुष्मिता लेप्चा र डालिमा छिबिरले समान १ गोल गरेकी थिइन् ।

राष्ट्रिय टोलीकी अनिता बस्नेत आबद्ध लर्डस् एफ ए इस्र्टन स्पोर्टिङ युनियनसँग ३–२ ले पराजित भएको छ । अनिता परिवर्तित खेलाडीका रुपमा ७५ औं मिनेटमा मैदान प्रवेश गरेकी थिइन् । सेथु, किकस्टार्टसँगै उडिसा एफसी तेस्रो र इन्र्टन स्पोर्टिङ चौथो स्थानामा रहँदै लिगको अन्तिम आठमा पुगेको छ ।

समूह चरणको ७ खेलको समाप्तीमा सेथुको १७, किकस्टार्ट र उबडिसा एफसीको समान १६ अंक र इस्टर्न स्पोर्टिङले १५ अंक जोडेको थियो । अनिता आबद्ध टोली समूहको सातौं स्थानमा रहेको थियो । दुई समूहमा आठ टोलीको सहभागिता थियो ।

समूह ‘ए’मा राष्ट्रिय टोलीकी फरवार्ड गोकुलम केरेला एफसी १९ अंकका साथ अघिल्लो चरण पुगिसकेको छ । राष्ट्रियब टोलीकै रेखा पौडेल सम्मिलित स्पोर्टस उडिसा (१३ अंक) दोस्रो, इस्ट बंगाल एफसी (१३ अंक) तेस्रो र होप्स फुटबल क्लब (१२ अंक) चौथो हुँदै क्वार्टरफाइनलमा पुगेका छन् । सबै क्वार्टरफाइनल खेल मंगलबार हुनेछ ।

मंगलबार हुने क्वार्टरफाइनल खेल

-किकस्टार्ट एफसीविरुद्ध होप्स फुटबल क्लब

-स्पोर्टस उडिसाविरुद्ध इस्टर्न स्पोर्टिङ

-गोकुलम केरेलाविरुद्ध उडिसा एफसी

-सेथुविरुद्ध इस्ट बंगाल