काठमाडौं (हाम्रो खेलकुद) – खेलमा दुईपटक अग्रता लिएपनि त्यसलाई जोगाउन नसक्दा फ्रेन्ड्स क्लब कुपन्डोल सहिद स्मारक ‘ए’ डिभिजन लिगमा न्युरोड टिम (एनआरटी) सँग बराबरीमा रोकिएको छ ।

फ्रेन्ड्स र एनआरटीले २–२ गोलको बराबरी खेल्दै अंक बाँडेका हुन् । एन्फा कम्प्लेक्समा आइतबार भएको खेलमा फ्रेन्ड्सका रफिक अमिनु र अमित तामाङले गोल गर्दा एनआरटीका निकोलस सर्ज सङले एक गोल गर्दा एक गोल उपहार पाएको थियो ।

रोमाञ्चक र प्रतिस्पर्धात्मक बनेको खेलको २८औं मिनेटमा रफिक अमिनुको गोलबाट फ्रेन्ड्सले पहिलो हाफमा १–० को अग्रता लिन सफल भएको थियो । ५८औं मिनेटमा अमित तामाङले आत्मघाती गोल गरेपछि खेल १–१ गोलको बराबरीमा पुग्यो ।

६६औं मिनेटमा अमित तामाङले पेनाल्टीमा गोल गर्दै फ्रेन्ड्सलाई पुनः २–१ को अग्रता दिलाए । तर, निर्धारित समयको अन्तिम मिनेटमा निकोलस सर्ज सङले गोल गर्दै एनआरटीलाई हारबाट जोगाए ।

यस बराबरीसँगै एनआरटी १८ खेलबाट २२ अंक जोडेर आठौं स्थानमा उक्लिएको छ । समान २२ अंक नै रहेपनि एनआरटी मनाङ भन्दा पछि र एपिएफभन्दा अघि छ । फ्रेन्ड्स १८ खेलबाट २० अंक जोडेर ११औं स्थानमा छ । समान २० अंक नै रहेपनि फ्रेन्ड्स संकटाभन्दा माथि छ ।

लिगको अंक तालिका, खेल तालिका, पुरानो नतिजा, सर्वाधिक गोलकर्ता, सर्वाधिक असिस्ट, क्लिन सिटलगायत सम्पूर्ण जानकारीका लागि यहाँ थिच्नुहोस ।